Azərbaycan, Bakı, 03 iyun / Trend , müxbir C.Babayeva /
Azərbaycan Yaşıllar Partiyası (AYP) bələdiyyə seçkisilə bağlı siyasi partiyalara müraciət edəcək.
"Həm hakim, həm də müxalifət partiyalarına ünvanlanacaq müraciətdə bələdiyyə seçkisində birgə və ya blok şəklində iştirakla bağlı danışıqların aparılması təklif olunacaq. Yaşıllar Partiyası yeni partiya olduğuna görə, seçkidə bələdiyyələrin 50 faizinə namizədlərini irəli sürmək imkanında olmayacaq. Partiyanın dövlət qeydiyyatının da olmaması seçkidə tək iştirakı mümkünsüz edir", - deyə çərşənbə günü Trend -a AYP sədri Mais Güləliyev bildirib.
Trend -un arayışı: Azərbaycanda bələdiyyə seçkisinin bu ilin dekabrında keçirilməsi nəzərdə tututlur. Hazırda ölkədə 2757 bələdiyyə fəaliyyət göstərir. Bələdiyyələrin birləşməsindən sonra onların sayının 1766-ya enməsi gözlənir.
Güləliyevin sözlərinə görə, sədri olduğu partiya bələdiyyə seçkisinin demokratik, şəffaf və ədalətli keçirilməsi üçün digər siyasi partiyalarla səylərin birləşdirilməsinin tərəfdarıdır.
"Təxminən 20 siyasi partiyaya ünvanlanacaq müraciətin onlar tərəfindən necə qarşılanacağı bilinmir. "Yaşıllar"ın özünəməxsusluğu var və biz digər siyasi partiyalara müraciət etməyi əksiklik hesab etmirik", -AYP sədri deyib.
Trend -un arayışı: Azərbaycan Yaşıllar Partiyası 2006-cı ilin dekabrında yaradılıb və hələ Ədliyyə Nazirliyində dövlət qeydiyyatına alınmayıb.
Məqalə müəllifi ilə əlaqə ünvanı: [email protected]
