Azərbaycan, Bakı, 09 oktyabr / Trend , müxbir A..Hüseynbala/
Azərbaycanın müxalifətyönlü partiyasının üzvləri bələdiyyə üzvlüyünə namizədliklərini fərdi qaydada irəli sürəcəklər.
"Partiyamız Ədliyyə Nazirliyində dövlət qeydiyyatına alınmadığına görə Siyasi Şuranın bu gün keçiriləcək iclasında üzvərimizin namizədliklərini fərdi şəkildə irəli sürməsi haqda qərar qəbul ediləcək", - cümə günü Trend -a yeni yaradılan Aydınlar Partiyasının sədri Qulamhüseyn Əlibəyli bildirib.
Trend -un arayışı: Azərbaycanda bələdiyyə seçkisi 2009-cu il dekabrın 23-də keçiriləcək. 1718 bələdiyyəyə 15682 bələdiyyə üzvünün seçilməsi nəzərdə tutulur.
Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
Əlibəylinin sözlərinə görə, partiyanın hazırda 30 rayon təşkilatı var və onların hər birinə bələdiyyə seçkilərində ayrılıqda seçkidə iştirak etmək üçün göstəriş veriləcək: "Biz seçki kampaniyası müddətində daha bir neçə rayonda yerli şobələrin yaradılması prosesini də başa çatdıracağıq", - partiya sədri əlavə edib.
Partiyanın qeydiyyata alınmasının yubadılmasına gəldikdə, Əlibəyli deyib ki, Ədliyyə Nazirliyinə bununla bağlı bir neçə dəfə rəsmi müraciət etsələr də, hələ ki, nəticəsi olmayıb. "Bizə hər dəfə deyirlər ki, sənədlərimiz yoxlanılır. Bu prosesin nə zaman başa çatdırılacağı isə bilinmir", - Əlibəyli vurğulayıb.
Aydınlar Partiyasının təsis qurultayı 2008-ci il dekabrın 14-də keçirilib. Qulamhüseyn Əlibəyli partiyanın sədri seçilib.
Qulamhüseyn Əlibəyli 1992-1993-cü ildə Prezident Əbülfəz Elçibəyin müşaviri və parlamentdə rəsmi nümayəndəsi olub. 1995-ci ildən 2005-ci ilədək iki dəfə ardıcıl olaraq Milli Məclisin deputatı olub. Avropa Şurası Parlament Assambleyasında Azərbaycan nümayəndə heyətinin üzvü olub. O, 1989-cu ildən AXC-nin üzvü, 1993-cü ildən isə АХCP-nin Ali Məclisinin sədri idi. 2008-ci il avqustun əvvəllərində АХCP Аli Məclisinin sədri vəzifəsindən istеfа vеrib, sеntyаbrın ахırındа yеni Аydınlаr Pаrtiyаsı yаrаdаcаğı məlum оlub.
Məqalə müəllifi ilə əlaqə ünvanı: [email protected]