Azərbaycan, Bakı, 11 dekabr / Trend , müxbir Ü.Sadıxova/
Azərbaycanın xarici işlər nazirinin müavini, Azərbaycan Diplomatik Akademiyasının rektoru, Azərbaycanın Birləşmiş Ştatlardakı keçmiş səfiri Hafiz Paşayev ABŞ Konqresinin Dağlıq Qarabağ separatçı rejiminə 8 milyard dollar ayrılması barədə qərarını Azərbaycan-ABŞ əlaqələrinin inkişafı yolunda mənfi addım adlandırıb.
"Konqresin bu addımı ABŞ və Azərbaycan münasibətlərinə mənfi təsir göstərə bilər, lakin ümid edirik ki, bu baş verməyəcək", - Paşayev bazar ertəsi jurnalistlərə deyib.
ABŞ Konqresi 2010-cu ildə Dağlıq Qarabağ separatçı rejiminə 8 milyon dollar maliyyə yardımı ayrılması barədə qərar qəbul edib.
Azərbaycanın ABŞ-dakı keçmiş səfiri Konqresin Birləşmiş Ştatların xarici siyasətinə qarışmasını Vaşinqtonun maraqlarına zidd addım kimi qiymətləndirib.
Onun sözlərinə görə, Konqresin bu hərəkəti ABŞ-da fəaliyyət göstərən erməni lobbisinin təsiri ilə şərtlənir.
"Konqresin ABŞ-ın xarici siyasətinə qarışması təkcə Azərbaycanla deyil, həmçinin digər ölkələrlə, məsələn Yaxın Şərqlə münasibətlərdə də özünü göstərir", - Paşayev deyib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Baş Assambleyasının Dağlıq Qarabağın və işğal olunmuş ərazilərin azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.