Azərbaycan, Bakı, 16 avqust /Trend, müxbir T.Hacıyev/
Azərbaycanın müxalif Milli İstiqlal Partiyası (AMİP) altmış seçki dairəsi üzrə namizədliyini müəyyənləşdirib. Bu barədə bazar ertəsi Trend-ə AMİP-in seçki katibi Rəşad Bayramov məlumat verib.
"Altmış dairə üzrə namizədlər müəyyənləşib, lakin bu, yekun siyahı deyil. Çünki bəzi dairələrdə bir neçə namizəd olduğuna görə, həmin dairələr üzrə qərar qəbul olunmayıb. Orada konkret olaraq hansı namizədin namizədliyini müdafiə edəcəyimiz ilə bağlı müzakirələr aparılır", - Bayramov əlavə edib.
Azərbaycanda Parlament seçkilərinin 2010-cu ilin noyabr ayının 7-də keçiriləcəyi gözlənilir. Bundanəvvəlki seçkilər 2005-ci ilin noyabr ayında keçirilib. Azərbaycanda Parlament seçkiləri majoritar sistem üzrə 125 seçki dairəsində keçirilir.
Bayramov partiya tərəfindən namizədlərin müəyyənləşməsi üçün kriteriyaları da açıqlayıb: "Namizədlərin müəyyənləşməsi üçün partiyanın mərkəzi aparatı tərəfindən müəyyən kriteriyalar müəyyənləşib. Namizədin indiyə qədərki fəaliyyəti, dairə ərazisində reytinqi, rayon təşkilatının namizədə münasibəti və digər bu kimi kriteriyalar üzrə ümumiləşdirmə aparılacaq və qərar qəbul olunacaq ki, hansı dairədən kimin namizədliyi irəli sürülsün", - Bayramov deyib.
Azərbaycan Milli İstiqlal Partiyası (AMİP) 1992-ci ildə təsis edilib. AMİP 1995-ci ildən dünyanın 63 ölkəsindən 82 sağ-mərkəzçi partiyaları özündə birləşdirən Beynəlxalq Demokrat İttifaqı ilə əməkdaşlıq edir. 12 noyabr 1998-ci Prezident seçkilərində AMİP-in ozamankı sədri Etibar Məmmədov namizədliyini irəli sürüb. 2003-cü il Prezident seçkilərindəki məğlubiyyətdən sonra, AMİP sədri Məmmədov sədrlikdən istefa verib. Həmin dövrdən sonra Əli Əliyev və Ayaz Rüstəmov partiya sədri vəzifələrini icra ediblər.
Partiyann iyulun 10-da keçirilən X qurultayında partiya sədri vəzifəsinə Yusif Bağırzadə seçilib.