Azərbaycan, Bakı, 2 sentyabr /Trend, müxbir T.Cəfərov/
İranın Azərbaycandakı səfiri Məhəmməd Bağır Bəhraminin fikrincə, Fələstində baş verən hadisələrdə yəhudilər deyil, "sionistlər" günahkardırlar.
"Fələstin xalqını öz dədə-baba yurdlarından didərgin salan yəhudilər deyil, "sionistlər"dir. Yəhudilər səmavi dinə sahibdirlər, lakin sionizm siyasi hərəkatdır", - Bəhrami İranda hər il Ramazan ayının sonuncu cümə gününün "Qüds günü" kimi qeyd olunması ilə bağlı danışarkən Trend-ə bildirib.
Trend -un arayışı: 1979-cu ildə İran İslam İnqilabı baş verdikdən sonra Fələstin xalqı ilə həmrəyliyin nümayiş etdirilməsi üçün İranda hər il Ramazan ayının sonuncu cümə günü "Qüds günü" elan edilib. O dövrdən etibarən hər il müsəlmanlar İsrailə etiraz əlaməti olaraq aksiyalar keçirirlər.
Bəhraminin sözlərinə görə, "sionistlər" Fələstin xalqını öz vətənlərindən didərgin salıblar və 60 ildən çoxdur ki, bu torpaqlarda "cinayət törətməkdə" davam edirlər. "Onların sonuncu cinayətləri kimi Qəzza xalqına hümanitar yardım aparan "Azadlıq" karvanına hücumu göstərmək olar, orada dünyanın bütün ölkələrindən müsəlman və qeyri-müsəlmanlar var idi", - səfir deyib.
Onun sözlərinə görə, "Qüds günü"ndə islam təmayüllü icmalar, islam və qeyri-islam ölkələrindəki müsəlmanlar, eləcə də müsəlman olmayanlar Fələstin xalqı ilə həmrəylik nümayiş etdirirlər. "Onlar Fələstin xalqı ilə həmrəylik nümayiş etdirməklə Fələstin xalqına öz mübarizəsini davam etdirməsi üçün dəstək verirlər. Ümid edirəm ki, müsəlmanların birinci qibləsi olan Qüds "sionist" rejiminin işğalından azad olunacaq və yəhudi, xristian və müsəlmanlardan ibarət Fələstin əhalisi öz torpaqlarına qayıdıb demokratik seçkilər keçirəcək, öz müqəddəratı ilə bağlı qərar qəbul edəcək", - Bəhrami deyib.
Müsəlmanların ilk qibləsi olan Qüds şəhəri 1967-ci ildə İsrail ordusu tərəfindən işğal olunub. 1980-ci ildə Knesset işğal olunmuş Qüds şəhərinin İsrail ərazisinə birləşdirilməsi haqqında qərar qəbul edib. Beynəlxalq ictimaiyyət, ərəb ölkələri və Fələstin Qüdsün iki yerə - qərb və şərq hissələrinə bölünməsini və onun şərq hissəsinin fələstinlilərə, qərbin isə İsrailə aid olmasını dəstəkləyirlər, lakin İsrail bununla razılşamır.
