Azərbaycan, Bakı, 14 yanvar /Trend, müxbir E.Tarıverdiyeva/
Ermənistan Prezidenti Serj Sarkisyan Rusiyaya bir daha onun tərəfdaşı olduğunu nümayiş etdirmək üçün qanunvericilikdə "əl yeri" tapıb. Avropalı ekspert, Trend-in Ekspert Şurasının üzvü Aleksandr Rar belə hesab edir.
"İndi digər ölkələr də, məsələn, Belarus bu "əl yeri"ndən Abxaziya və Cənubi Osetiyanı rəsmən tanımamaqla Rusiyaya tanınmamış respublikalarla işləməyə hazır olduqlarını işarə vermək üçün istifadə edə bilərlər", - Almaniyanın Xarici Siyasət Şurasının "Rusiya-Avrasiya" Mərkəzinin direktoru Rar Berlindən telefonla Trend-ə bildirib.
Ermənistan Prezidenti Serj Sarkisyan dekabrın 17-də parlamentin qəbul etdiyi "Beynəlxalq müqavilələr haqqında" qanuna düzəlişləri imzalayıb. Bu dəyişikliklər beynəlxalq hüquq tərəfindən tanınmamış subyektlərlə sülhün təminatı, insan haqlarının müdafiəsi, humanitar, iqtisadi və maliyyə yardımı məsələlərini nizamlamağı nəzərdə tutur.
Qanun layihəsinə əsasən, beynəlxalq müqavilə tərəfi beynəlxalq hüququn tanınmamış subyekti ola bilər.
2008-ci il avqustun 8-nə keçən gecə tanınmamış "Cənubi Osetiya respublikası"nda irimiqyaslı hərbi əməliyyatlar başlayıb. Gürcü qoşunları Sxinvaliyə daxil olub. Sonradan rus qoşunları Sxinvalini tutub və gürcü hərbçiləri Gürcüstan ərazisinə sıxışdırıblar. Avqustun sonlarında Rusiya Cənubi Osetiya və Abxaziyanın müstəqilliyini tanıyıb. Buna cavab olaraq, Tbilisi Moskva ilə diplomatik münasibətləri pozub və iki tanınmamış respublikanı işğal olunmuş ərazilər elan edib.
Rarın sözlərinə görə, Rusiya Abxaziya və Cənubi Osetiyaya himayədarlıq etdiyi üçün öz müttəfiqlərindən onların tanınmasını tələb edir.
"Ermənistan Rusiyanın yaxın müttəfiqləri tərəfindən kvazi-tanınma nümunəsi yaratdı", - o deyib.
Rarın fikrincə, əgər Prezident Sarkisyan tərəfindən imzalanan qanun separatçı regionların ərazisində hansısa nümayəndəliyin açılması ilə nəticələnsə, bu, Qərbdə böyük əks-səda doğuracaq.
"Bu, Ermənistanla Gürcüstan arasında münasibətlərin gərginləşməsinə səbəb ola bilər. Bununla yanaşı, hüquqi nöqteyi-nəzərdən Ermənistan bu əraziləri tanımır, çünki orada səfirlik və diplomatik nümayəndəlik olmayacaq", - politoloq bildirib.
