Azərbaycan, Bakı, 16 fevral /Trend, müxbir T.Cəfərov/
Dövlət Departamentinin mətbuat katibi Alan Eyr Birləşmiş Ştatların İranda insan haqlarının tam qorunmasında təşəbbüskar olduğunu deyib.
"ABŞ dövləti çox ciddi şəkildə öz müttəfiqləri ilə birlikdə çalışır ki, İran vətəndaşlarının hüquqları tam qorunsun. ABŞ açıq şəkildə İranda insan haqlarının pozulmasına münasibət bildirib və bu sahədə təşəbbüskar olub", - Eyr cümə axşamı Trend-ə müsahibəsində deyib.
Sərhədsiz Reportyorlar ötən həftə dünya ölkələrində mətbuat azadlığı haqqında illik məruzəsini açıqlayıb. Həmin məruzədə İran dünyanın 179 ölkəsi arasında mətbuat azadlığı üzrə 175-ci yerdə dayanır. İranda insan haqları müdafiəçiləri bildirir ki, ABŞ dövləti İranın nüvə proqramına göstərdiyi həssaslığı bu ölkədəki insan haqlarının vəziyyəti barədə göstərmir. Onlar bildirirlər ki, ABŞ sonuncu prezident seçkiləri zamanı baş verən hadisələrdə müxalifəti dəstəkləmədi.
2009-cu ildə İranda keçirilmiş prezident seçkilərindən sonra insan haqlarının pozulması ilə bağlı İran tez-tez gündəmə gəlməkdədir. Belə ki, ötən müddət ərzində beynəlxalq təşkilatlar dəfələrlə İranda yaşayan insanların müxtəlif hüquqlarının pozulması və əhaliyə qarşı zor tətbiq olunması ilə bağlı məruzələrlə çıxış ediblər. Bu məsələ BMT-nin İnsan Hüquqları Şurasının, eləcə də digər beynəlxalq təşkilatların İranla bağlı ciddi narahatlığına səbəb olub.
Dövlət Departamentinin mətbuat katibi Eyr deyib ki, Prezident Obama, dövlət katibi xanım Kilinton və ABŞ-ın digər yüksək rəsmiləri öz bəyanatlarında İrandakı insan haqları ilə bağlı mövqelərini açıq şəkildə ortaya qoyublar.
"BMT-də İran üçün insan haqları üzrə xüsusi məruzəçinin təyin edilməsi məqsədilə bizim rəhbərlik çox çalışıb, bundan başqa, İran xalqının hüquqlarını dəfələrlə və kobud şəkildə pozmuş (Bəsic, polis və Sepahın 13 üzvünün) şəxslərə qarşı məqsədli sanksiyalar tətbiq olunub, onların ABŞ-a səfəri qadağan edilib və hesabları dondurulub. Bunlar bizim ölkənin bu sahədə gördüyü işlərdən bir nümunədir", - Eyr deyib.
BMT-nin İnsan Hüquqları Şurası iyunun 17-də Maldiv adalarının keçmiş xarici işlər naziri Əhməd Şəhidini İranda insan hüquqları ilə bağlı xüsusi məruzəçi təyin edib. İran rəsmiləri bildirib ki, İranda BMT-nin insan haqları ilə bağlı xüsusi nümayəndəsini qəbul etməyəcəklər.
Eyr ABŞ-ın həmçinin Avropa İttifaqı ölkələri ilə əməkdaşlıq edərək oxşar sanksiyaların İranda insan haqlarını pozan şəxslərə qarşı tətbiq olunmasına çalışacağını bildirib.
"Biz yenə də iranlıların hüquqlarının qorunması və İran rejiminin onların səsini boğmağa çalışmasını tənqid edəcəyik və bu işi davam etdirəcəyik. Avropa İttifaqı ölkələri ilə əməkdaşlıq edərək orada insan haqlarını pozan şəxslərə qarşı sanksiyalar tətbiq edəcəyik", - Eyr bildirib.
ABŞ Prezidenti Barak Obama 2009-cu ildə İranda prezident seçkilərindən sonra insan hüquqlarının pozulmasında ittiham edilmiş səkkiz rəsmiyə qarşı sanksiyaların tətbiq edilməsi haqqında fərman imzalayıb. Bundan başqa, Dövlət Departamentinin rəhbəri Hilari Kilinton bəyanat yayaraq bildirib ki, ABŞ Böyük Britaniya və Kanada ilə birlikdə İranda insan haqlarının pozulmasında rolu olan şəxslərə və rəsmilərə vizanın verilməsini dayandıracaq. O bildirib ki, bu onu göstərir ki, həmin üç ölkə İran xalqının yanındadır.
