Azərbaycan, Bakı, 27 mart /Trend, müxbir E.Mehdiyev/
Azərbaycanın müxalifət partiyaları yeni formatda görüş keçirib. Bu barədə çərşənbə axşamı Trend-ə açıqlamasında Azərbaycan Milli İstiqlal Partiyasının (AMİP) sədri Yusif Bağırzadə deyib.
Onun sözlərinə, beşlik formatında keçirilən görüşdə ADP sədri Sərdar Cəlaloğlu, Müsavat başqanı İsa Qəmbər, AXCP sədri Əli Kərimli, KXCP sədri Mirmahmud Mirəlioğlu və AMİP sədri Yusif Bağırzadə iştirak edib.
AMİP tərəfindən təşkil olunan görüşdə Azərbaycandakı ictimai-siyasi vəziyyət müzakirə olunub.
Bağırzadə qeyd edib ki, bu görüşlərin partiyaların bloklarda təmsilçiliyinə aidiyyəti yoxdur. Bu görüşlər ancaq dialoq formasında keçirilir.
"Görüşdə səsləndirilən fikirlərdən biri də odur ki, bir sıra məsələlərdə biz bir araya gələ bilərik, vahid mövqedən çıxış edə bilərik", - partiya sədri deyib.
O, bildirb ki, bu cür görüşlərin ayda ən azı iki dəfə keçirilməsi qərar alınıb.
Qeyd edək ki, bir müddət əvvəl AMİP müxalifətin vahid mövqedən, vahid sənədlə, vahid platformadan çıxış etməsi təşəbbüsünü irəli sürmüşdü.
