Azərbaycan, Bakı, 27 dekabr /Trend, müxbirlər T.Cəfərov, Y.Kosoplapova/
İran islahatçıları sabiq Prezident Məhəmməd Xatəminin qarşıdakı prezident seçkilərdə iştirakı məsələsi ilə bağlı ölkənin ali lideri Ayətullah Əli Xamneyiyə məktub göndəriblər. Trend-in məlumatına görə, bu barədə cümə axşamı ILNA agentliyi İran İslam Koalisiyası Partiyasının nümayəndəsi Əsədullah Badamçyana istinadən məlumat verir.
Seyid Məhəmməd Xatəmi 1997-ci il avqustun 2-dən 2005-ci il avqustun 3-dək ölkə başçısı olub.
Badamçyanın sözlərinə görə, islahatçılar məktublarında ali liderdən Xatəminin qarşıdakı seçkilərdə iştirakına icazə verməyi xahiş ediblər.
İranda növbəti prezident seçkiləri 2013-cü il iyunun 14-də keçiriləcək.
"İslahatçıların növbəti prezident seçkilərinə münasibətdə bir neçə yanaşması var. Bəziləri deyirlər ki, onlar seçkilərdə iştirak etməyəcəklər. Digərləri seçkiləri boykot etməyə çağırır. Bir qrup isə Məhəmməd Xatəmininin seçkilərdə namizədliyinə ümid edir", - Badamçyan qeyd edib.