Azərbaycan, Bakı, 28 yanvar /Trend/
Ermənistan Təhlükəsizlik Şurasının katibi Artur Baqdasaryanın dəvəti ilə Kollektiv Təhlükəsizlik Müqaviləsi Təşkilatının (KTMT) baş katibi Nikolay Bordyujanın başçılıq etdiyi nümayəndə heyəti Yerevana gəlir.
Trend-in Ermənistan KİV-ə istinadən verdiyi məlumata görə, nümayəndə heyətinə KTMT-nın 40 üzvü, həmçinin təşkilatın yüksəkvəzifəli məmurları, hərbi-texniki əməkdaşlıq üzrə qurumlararası komissiyası və onun tərkibində fəaliyyət göstərən İşgüzar Şuranın üzvləri daxildir.
Səfər çərçivəsində hərbi-texniki əməkdaşlıq üzrə qurumlararası komissiya və onun tərkibində fəaliyyət göstərən İşgüzar Şuranın Ermənistan-Rusiya tərkibli iclası keçiriləcək. İclasın yekunu üzrə protokol imzalanacaq. Tədbir çərçivəsində Ermənistan-KTMT-nin birgə addımlarının həyata keçirilməsi, həmçinin hərbi-iqtisadi və hərbi-texniki əməkdaşlığın bir sıra məsələləri müzakirə ediləcək.
Səfər çərçivəsində Rusiyanın hərbi-sənaye müəssisələrinin rəhbərləri Ermənistanın bu sahədəki müəssisələrinə baş çəkəcək, onların istehsal imkanları ilə tanış olacaq, əməkdaşlığın yeni proqramlarını müəyyənləşdirəcəklər.
Baqdasaryan və Bordyuja Ermənistanda KTMT Akademiyasının təsis edilməsi haqqında memorandum imzalayacaqlar.