Bakı. Trend:
Azərbaycanda keçiriləcək bələdiyyə seçkilərində 1000 seçki məntəqəsində veb-kameralar quraşdırılacaq.
Trend xəbər verir ki, bunu yanvarın 11-də Mərkəzi Seçki Komissiyasının sədri Məzahir Pənahov bələdiyyə seçkiləri ilə əlaqədar seçki bülletenlərinin mətbəədə çapına başlanması prosesi çərçivəsində jurnalistlərə açıqlamasında deyib.
"Xüsusilə üzərində dayandığım fakt veb-kamera praktikasıdır. Bu artıq beynəlxalq miqyasda Azərbaycan təcrübəsi adını qazanıb, müəlliflik hüququmuz var. Bələdiyyə seçkilərində də 1000 məntəqədə veb-kameralar quraşdırılacaq", - o bildirib.
MSK sədri qeyd edib ki, veb-kameraların quraşdırıldığı məntəqələr elə yerlərdə seçilir ki, Azərbaycan ərazisini, coğrafiyasını əhatə etsin. Qurğular vasitəsilə məntəqə açılandan, səhər saat 08:00-dan əvvəl belə oradakı hazırlıq işləri daxil olmaqla bütün hadisələri fasiləsiz olaraq izləmək mümkündür”.
Məzahir Pənahov vurğulayıb ki, veb-kameralər vasitəsilə məntəqə bağlandıqdan sonra bütün proseslər başa çatanadək baş verən hadisələri izləmək fürsəti də olacaq.
“Görüntülər ən son standartlara cavab verir. Hər şey açıq-aşkar, aydın şəkildə görünür. Veb-kamera faktoru bu prosesləri maksimum dərəcədə şəffaf keçirməyə şərait yaradır”, - deyə MSK sədri qeyd edib.
Qeyd edək ki, yanvarın 29-da Azərbaycanda bələdiyyə seçkiləri keçiriləcək.