Avqustun 10-da Vətəndaş Həmrəyliyi Partiyasının (VHP) qərargahında keçirilməsi nəzərdə tutulmuş iqtidar-müxalifət partiyalarının görüşü baş tutmayıb. VHP sədri Trend ə bildirib ki, görüşün təxirə salınması barədə iştirakçı partiyalara öz adından məktub göndərib.
Sabir Rüstəmxanlı iqtidar və müxalifət partiyalarına müraciətində bildirib ki, tərəflər arasında avqustun 10-na planlaşdırılan görüş qeyri-müəyyən vaxta təxirə salınır. Lakin iqtidarla müxalifət arasında dialoqun zəruriliyini nəzərə alaraq bu görüşün bir müddətdən sonra baş tutması üçün VHP növbəti dəfə təşəbbüs göstərəcək.
Qeyd edək ki, iqtidar tərəfini təmsil edən üç partiya bu görüşdə Azərbaycan Xalq Cəbhəsi Partiyasının (AXCP-islahatçılar) iştirakına etiraz olaraq dəyirmi masaya qatılmaqdan imtina ediblər.
Onlar AXCP rəhbərini Ermənistanın xüsusi xidmət orqanları ilə əməkdaşlıqda ittiham edərək onunla bir masa arxasında müzakirələr aparmaq niyyətində olmadıqlarını bəyan ediblər.
Sabir Rüstəmxanlı bildirib ki, yaranmış bu gərginliyin səngiməsi üçün bir müddət vaxt keçməlidir və o, bundan sonra yenidən danışıqlara başlayacaq, iqtidarla müxalifət nümayəndələrinin bir araya gəlməsinə çalışacaq.
