"Bu gün Rəsul Quliyevi qarşılamağa hazırlaşanlar vaxtilə o, ölkəni tərk edəndə deyirdilər ki, yaxşı oldu getdi, cinayətkarın axırı belə olar. Biz isə dedik ki, Rəsul Quliyev qayıtmaq üçün gedir. Amma bu gün onun tərəfdarı kimi çıxış edən bəzi insanlar o zaman Rəsul Quliyevi "cinayətkar" adlandırıb getməyinə sevinirdi". Bu fikrləri Trend ə açıqlamasında Azərbaycan Xalq Cəbhəsi Partiyasının (AXCP) "Klassiklər" qanadının sədri Mirmahmud Mirəlioğlu bildirib. O, Azərbaycan Demokrat Partiyasının (ADP) sədri, eks-skiper Rəsul Quliyevin oktyabrın 17-də Azərbaycana qayıtmasına qərar verilməsinə münasibətini bildirərkən deyib ki, onun qayıdışının nə ilə nəticələnməsi, ölkəyə və ictimaiyyətə hansı faydasının olub-olmaması ilə bağlı obyektiv qiymət verəcək.
M.Mirəlioğlunun sözlərinə görə, ADP liderinin qayıdışı prosesinin başlanğıcda Azərbaycan ictimaiyyəti üçün müsbət nəticəsi olacaq: "Xüsusilə də R.Quliyevin dostları, tərəfdarları və partiyası üçün faydalı olacaq. Rəsul Quliyev ADP-yə sədr seçiləndən partiya üzvləri heç vaxt öz sədrlərini görməyiblər, indii onlar oz liderlərinə qovuşacaqlar"-deyə M.Mirəloğlu bildirib.
Mirmahmud Mirəlioğlunun fikrincə, R.Quliyevin qayıdışı problemsiz olacaq və heç bir qarşıdurma baş verməyəcək: "Daxili İşlər Nazirliyinin Rəsul Quliyevin həbs olunacağı kimi bəyanatlar verməkdənsə, ümumiyyətlə danışmaması daha yaxşı olardı, çünki hüquq-mühafizə orqanları rəsmiləri hər dəfə qanunları bilmədiklərini nümayiş etdirirlər. Bir nazirin, məmurun bəyanatları heç də o demək deyil ki, hakimiyyət tərəfindən qeyri-peşəkarcasına, səriştəsiz addımlar atılacaq.
Çünki hakimiyyətdə kifayət qədər ağıllı, tədbirli adamlar var və onlar öz hakimiyyətlərini qorumaq üçün ağılla hərəkət edəcəklər"-deyə M.Mirəlioğlu vurğulayıb. O, həmçinin R.Quliyevin də siyasətdə təcrübəli şəxs olduğunu qeyd edərək onun öz qayıdışı ilə qarşıdurma yaratmayacağını deyib.