Türkiyə prezidenti Əhməd Necdət Sezərin Azərbaycana təxirə salınmış rəsmi səfərinin tarixi hələ məlum deyil. Bu barədə Trend ə Türkiyənin prezident administrasiyasının mətbuat xidmətindən (Çankaya) məlumat verilib.
Türkiyə prezidenti Bakıya yanvarın 25-26-da səfər etməli idi. Lakin yanvarın 24-də günün ikinci yarısında səfərin başqa vaxta keçirilməsi haqqında qərar qəbul edilib.
Yanvarın 24-də Ə.N.Sezər prezident İlham Əliyevə zəng edərək təəssüflə Türkiyədə və Azərbaycanda hava şəraitinin kəskin pisləşməsi ilə əlaqədar səfəri təxirə saldığını bildirib.
"Prezidentin səfəri 2006-cı ilin yanvarında baş tutacaqmı?" sualına cavab olaraq mətbuat xidmətindən bildiriblər ki, "dəqiq tarix sonra açıqlanacaq".