Bu il 13 mayda keçiriləcək təkrar parlament seçkisində iştirak edən namizədlərin sayı 110 nəfərə çatıb. Bu barədə Trend ə Mərkəzi Seçki Komissiyasından (MSK) məlumat verilib.
Namizədliyinin irəli sürülməsi təsdiqlənən 110 nəfərdən 106-sı imza vərəqələrini götürüb. Onlardan dörd nəfəri imzatoplama kampaniyasını başa çatdıraraq imza vərəqələrini artıq dairə seçki komissiyalarına təhvil verib. Namizədlərdən hələlik qeydə alınan yoxdur. Ən çox namizədin irəli sürüldüyü seçki dairəsi 9 saylı Binəqədi ikinci seçki dairəsidir - 27 nəfər. 31 saylı Suraxanı ikinci seçki dairəsindən 21 nəfər, 38 saylı Gəncə-Nizami ikinci seçki dairəsindən 7, 42 saylı Sumqayıt ikinci seçki daiərsindən 14, 44 saylı Sumqayıt-Abşeron dairəsindən 8, 69 saylı Cəlilabad- Masallı-Biləsuvar dairəsindən 6, 103 saylı Gədəbəy dairəsindən 3, 106 saylı Tovuz-Qazax-Ağstafa dairəsindən 7, 110 saylı Zaqatala dairəsindən 8, 119 saylı Ağdam kənd seçki dairəsindən 9 nəfər namizədliyini irəli sürüb.
Siyasi yönümünə görə namizədlərin əksəriyyəti bitərəf şəxslərdir. Siyasi mənsubiyyətini göstərənlər isə Yeni Azərbaycan, Müsavat, Ədalət, Kommunist, Böyük Azərbaycan, Respublikaçılar, Vətəndaş Birliyi, Ümid partiyalarının üzvləridir.