"Qəhrəman Hacıyev rəis işlədiyi dövrdə Gəncənin nəqiliyyat sistemində bir sıra nöqsanlar olub. Mən bu nöqsanları aradan qaldırmağa çalışacağam". Bu fikri "Azəravtonəqiliyyat Servis" Departementinin 1 saylı Regional Nəqiliyyat Məhdud Məsuliyyətli Cəmiyyətinin yeni rəisi Şəmistan Nağıyev bu gün keçirdiyi mətbuat konfransında söyləyib.
Trend bildirir ki, Şəmistan Nağıyevin sözlərinə görə, departament 12 saylı Ərazi Vergilər İdarəsi və şəhər Yol Polisi ilə sıx əməkdaşlıq edəcək. Belə ki, sürücülərin dövlət rüsumlarını ödəməsində vergi orqanlarının əməkdaşları onlara yaxından kömək edəcək. Yol polisi isə şəhərdaxili və şəhərlərarası nəqiliyyatın təyin edilmiş qrafikdən kənara çıxmasının qarşısını almaq üçün departament əməkdaşlarına kömək edəcək.
Ş.Nağıyev onu da qeyd edib ki, Gəncədə şəhərdaxili nəqiliyyat xoşagələn halda deyil. İstismar müddəti bitmiş mikroavtobuslar sərnişindaşıma ilə məşğul olur. Nağıyev sözlərinə görə, ilin sonuna kimi belə mikroavtobuslar yeniləri ilə əvəz olunacaq.
Qanunsuz işləyən şəhərlərarası avtobuslara qarşı isə ciddi tədbir görüləcək.
