Azərbaycan və Pakistan arasında iqtisadi əməkdaşlıq üzrə hökumətlərarası işçi qrupun hazıkı görüşləri çərçivəsində Pakistan tərəfi iqtisadi əməkdaşlığın inkişaf etdirilməsi ilə bağlı Azərbaycana bir sıra təkliflər təqdim edib. Bu barədə eksklüziv olaraq Trend ə Azərbaycanın Pakistandakı səfirliyinin iqtisadi məsələlər üzrə məsləhətçisi Sabir Rzayev bildirib.
Onun sözlərinə görə, gündəliyə kiçik və orta sahibkarılğa investisiya yatırılması sahəsində əməkdaşlıq məsələləri daxil olub. Pakistan tərəfi biznes şurasının yaradılması barədə bir sıra təkliflərlə çıxış edib, qarşılıqlı anlaşma haqqında memorandumun layihəsi təqdim edilib.
Tərəflər həmçinin informasiya texnologiyaları məsələləri üzrə məsləhətləşmələr aparıblar, xüsusən beynəlxalq telefon danışıqları tariflərinin azadılması məsələsi müzakirə edilib. Kənd təsərrüfatı, bank kimi sahələrdə əməkdaşlıq məsələləri nəzərdən keçirilib, Pakistan tərəfi bank əməkdaşlarının ixtisasartırma kurslarının təşkil edilməsini təklif edib.
Hökumətlərarası komissiyanın həmsədri, Azərbaycan baş nazirinin birinci müavini Yaqub Eyyubov və Pakistan neft və təbii ehtiyatlar naziri Əmənulla Xan Cadunun görüşü sabah olacaq. Məsləhətçi bildirib ki, həmçinin hər iki tərəfdən komissiyanın tərkibinə daxil olan müxtəlif nazirlik rəhbərlərinin ayrı-ayrı görüşləri planlaşdırılıb.
