Azərbaycan, Bakı / Trend müxbir İ.Əlizadə/ Yeni Azərbaycan Partiyası (YAP) Xocalı faciəsinin 15-ci ildönümü ilə əlaqədar BMT-nin baş katibi Pan Gi Muna, ATƏT-in fəaliyyətdə olan sədri Migel Angel Moratinosa, Avropa Şurasının Baş katibi Terri Devisə və AŞ PA-nın sədri Rene van Der Lindenə müraciət edib. Ermənistanın Azərbaycana qarşı həyata keçirdiyi tarixi təcavüz ilhaq siyasəti, erməni təcavüzü nəticəsində ən müxtəlif dövrlərdə törədilmiş qanlı cinayətlər, kütləvi qırğınlar və nəhayət, ermənilərin soyqırım siyasətinin tərkib hissəsi kimi Xocalı faciəsindən bəhs edilən məktubda deyilir:"Xocalıda dinc əhaliyə qarşı həyata keçirilən vandalizm və qətllər erməni aqressivliyinin və millətçiliyinin əsil mahiyyətini və iç üzünü bir daha bütün dünyaya nümayiş etdirdi. Bu faciə insanlıq əleyhinə törədilmiş ən ağır cinayətlər sırasındadır. Onun günahkarları insan hüquqları ilə bağlı beynəlxalq normaları, o cümlədən, müharibənin aparılması qaydaları və əsirlərin hüquqi statusu barədə Haaqa və Cenevrə sazişlərini kobudcasına pozaraq sözün həqiqi mənasında qətliam cinayəti törədiblər". Məktubda vurğulanır ki, Xocalı soyqırımı əslində Azərbaycana qarşı bir neçə əsr əvvəl başlayan və yüksələn xətt üzrə davam edən erməni təcavüzünün davamı və tərkib hissəsidir. Mərhələlərlə həyata keçirilən işğal və ilhaq siyasəti daim azərbaycanlıların Ermənistandan kütləvi deportasiyası ilə müşayiət olunmuş və Azərbaycanın tarixi torpaqlarının zəbt edilməsi ilə nəticələnib. Terrorçuluğu və millətçilik ideologiyasını dövlət siyasəti səviyyəsinə qaldırmış işğalçı Ermənistanın təcavüzkar siyasətinə birmənalı münasibət bildirilməsini və dünya ölkələri tərəfindən Xocalı soyqırımının genosid kimi qiymətləndirilməsini tələb edən məktubda daha sonra bildirilir: "Beynəlxalq ictimaiyyətin bu hadisələrə vaxtında hüquqi və siyasi qiymət verməməsi təcavüzkarı daha da həvəsləndirmiş, nəticədə Ermənistan Azərbaycanın Dağlıq Qarabağ bölgəsi də daxil olmaqla bütövlükdə 20 faiz ərazisini işğal etmiş, bir milyondan artıq Azərbaycan vətəndaşı öz doğma torpaqlarından qovulmuşdur."
YAP hesab edir ki, beynəlxalq təşkilatlar və dünya birliyi terrorçuluğu və millətçilik ideologiyasını dövlət siyasəti səviyyəsinə qaldırmış təcavüzkar Ermənistanı dayandırmalı və bu gün də davam edən erməni işğalına son qoymalıdır. Partiya BMT, ATƏT və Avropa Şurasının üzvü olan ölkələrə müraciət edərək Xocalı soyqırımını ümumbəşəri bir faciə - genosid kimi qiymətləndirməyi və bu hadisənin əsl mahiyyətinin dünya ictimaiyyətinə çatdırılmasına, günahkarların cəzalandırılmasına köməklik göstərməyi xahiş edir.
Qeyd edək ki, YAP 1992-ci ildə Naxçıvanda yaradılıb. Partiyanın ilk sədri mərhum eks-prezident Heydər Əliyev olub. 14 ildir hakim partiya olan YAP-ın indiki sədri prezident İlham Əliyevdir.