...

Azərbaycanın Fövqəladə Hallar Nazirliyi Belarusdan yeni texnikalar alacaq

Siyasət Materials 13 Mart 2007 14:04 (UTC +04:00)

Azərbaycan, Bakı / Trend müxbir K.Zərbalıyeva/ Azərbaycanın Fövqəladə Hallar Nazirliyi Belarusdan fəlakət zonalarında xilas etmə işlərinə yardımçı olan texnikaların alınmasına başlayıb. Fövqəladə hallar naziri Kəmaləddin Heydərov bildirib ki, Belarusda traktor sənayesi güclü inkişaf etdiyindən onların texnikalarından fəlakət zonalarında istifadə olunması məsləhət bilinib: "Bu yaxınlarda biz Bakıda və respublikanın rayonlarında qar təmizləmək üçün bir neçə texnika almışıq. Ağır traktorların - bulduzer və ekskavatorların alınması üçün də artıq danışıqlar gedir. Bu il də Belarusdan bir neçə texnika alınacaq".

K. Heydərovun sözlərinə görə, hər bir dövlətin xilasedici qurumları öz ölkələrinin iqtisadi, coğrafi mövqeyinə uyğun həmin sahə üzrə daha güclü ixtisaslaşır. Ona görə də Azərbaycanın Fövqəladə Hallar Nazirliyi həmin qurumlarla əməkdaşıqda ölkəmizə xas olan tərəflərə üstünlük verir: "Belarusda meşə yanğınları tez-tez baş verir. Bizim əməkdaşlarımız onların bu sahədəki təcrübəsini öyrənməyə çalışır. Bu ölkə ilə əməkdaşlıqda önəm verdiyimiz əsas istiqamət onların elmi potensialından yararlanmaqdır. Azərbaycanın iqtisadiyyatı güclü inkişaf edir. İqtisadiyyatda yeni, müasir avadanlıqlardan istifadə olunur. Onların təhlükəsiz işləməsi üçün dünya təcrübəsindən yararlanmaq lazımdır".

Xəbər lenti

Xəbər lenti