Azərbaycan, Bakı / Trend müxbir İ.Əlizadə/ Milli Məclisin Regional məsələlər daimi komissiyasının martın 29-da keçirilən iclasında "Bələdiyyələrə əlavə səlahiyyətlərin verilməsi haqqında" qanun layihəsi müzakirə olunub. Komissiyanın sədri Arif Rəhimzadə müzakirəyə daxil edilən "Bələdiyyələrə əlavə səlahiyyətlərin verilməsi haqqında" qanun layihəsi ilə komissiya üzvlərini tanış edib.
A.Rəhimzadə bildirib ki, qanun müvafiq icra hakimiyyəti orqanları tərəfindən bələdiyyələrə yerli əhəmiyyətli məsələlərin həlli üçün əlavə səlahiyyətlərin verilməsini və bunun həyata keçirilməsini müəyyən edəcək. Qeyd olunub ki, müvafiq icra strukturları bələdiyyə orqanlarına dövlət mülkiyyətində olan obyektlərin idarə olunması, yaşayış fondu, qeyri-yaşayış binaları, infrastruktur obyektlərinin istismarı, ictimai nəqliyyatın, təsərrüfat yollarının, təhsil, mədəniyyət, səhiyyə, idman və bədən tərbiyəsi ilə bağlı sahələrin idarə olunması və inkişafı, bələdiyyə ərazisində yerləşən tarixi abidələrin, park və qəbristanlıqların abadlaşdırılması, vətəndaşlıq vəziyyəti aktlarının qeydiyyatı ilə bağlı müəyyən səlahiyyətlər verə bilər.
Komissiya üzvləri və mütəxəssislər sənədi ətraflı müzakirə edərək, Milli Məclisə çıxarılmasını məqsədəuyğun hesab ediblər.