Azərbaycan, Bakı / Trend müxbir İ.Əlizadə/ "Tibbi sığorta haqqında" qanun bir neçə il bundan qabaq qəbul olunsa da, işləmir. Bu barədə Milli Məclisin Sosial siyasət daimi komissiyasının sədr müavini, millət vəkili Musa Quliyev bildirib.
Onun sözlərinə görə, ötən ildən Nazirlər Kabineti qanunun tətbiqi mexanizmi üzərində çalışsa da, hələ konkret nəticə yoxdu. Araşdırmalar nəticəsində məlum olub ki, adıçəkilən qanuna bir sıra dəyişikliklər edilməlidir və parlament həmin dəyişikliklərin icra hakimiyyəti orqanları tərəfindən təqdim olunmasını gözləyir.
Quliyev vurğulayıb ki, bu il Azərbaycanda aparılan monitorinq göstərir ki, səhiyyə xərclərinin təxminən 30 faizi dövlət, 70 faizi vətəndaşların özləri tərəfindən ödənilir. Vətəndaşlar tərəfindən ödəniş qeyri leqal şəkildə baş verir. Onun fikrincə, əgər tibbi sığorta tətbiq olunarsa, işləyən insanların iş yerindən sığortalanması, təqaüdçülərin, uşaqların və əlillərin dövlət sosial müdafiə orqanları tərəfindən sığorta olunması həyata keçiriləcək: "Bununla da, əhalinin tibbi xərclərinin ən azı 70-80 faizi dövlət tərəfindən ödəniləcək. Bu da səhiyyə xidmətinə insanların cəlb olunmasını yaxşılaşdıracaq, xəstəliklərin aradan qaldırılmasına səbəb olacaq və vətəndaşların lazımi səviyyədə tibbi xidmət alması ilə nəticələnəcək. Yəni, dövlətin öz vətəndaşına qayğısı konkret şəkildə ortada olacaq".
