Azərbaycan, Bakı, 23 may/ Trend , müxbir İ.Əlizadə/ Azərbaycanda yaşayan rus icması payızda keçiriləcək prezident seçkisində hakim Yeni Azərbaycan Partiyasının (YAP) namizədi, hazırkı dövlət başçısı İlham Əliyevin namizədliyini dəstəkləyəcək. "Prezident seçkisi kampaniyasına start veriləndən sonra Azərbaycanda yaşayan rus icmasının qurultay və ya konfransı keçiriləcək. Tədbirdə YAP-ın namizədi İlham Əliyevin dəstəklənməsi haqqında qərar qəbul olunacaq", - deyə cümə günü Trend -a eksklüziv açıqlamasında Azərbaycanda Rus İcmasının sədri, "Azərbaycan-Rusiya" cəmiyyətinin vitse-prezidenti, deputat Mixail Zabelin bildirib.
Trend -un arayışı: Azərbaycanda yaşayan rusların sayı 100 min nəfərdən artıqdır. (1999-cu ilin siyahıya alınmasına görə, 141 min nəfər). Əksəriyyəti Bakıda, Sumqayıtda və Gəncədə yaşayır.
Rus icması 2003-cü ildə keçirilən prezident seçkisində YAP-ın namizədi olan İlham Əliyevin namizədliyini dəstəkləmək haqqında qərar qəbul etmişdi.
Azərbaycanda prezident seçkisi 2008-ci il oktyabrın 15-də keçiriləcək. YAP hazırkı prezident İlham Əliyevin namizədliyini irəli sürəcəyini açıqlayıb. "İlham Əliyevin prezident olduğu dövrdə Azərbaycanda yaşayan ruslar etnik mənsubiyyətlərinə görə heç bir problemlə qarşılaşmayıblar. Rusların problemləri azərbaycanlıların üzləşdikləri çətinliklərlə eynidir. Ona görə də Azərbaycanda yaşayan ruslar prezident seçkilərində İlham Əliyevə alternativ görmürlər", - deyə icma rəhbəri əlavə edib.
Zabelin qeyd edib ki, icmanın tədbirində qəbul olunacaq qərar bütün rusların mövqeyini əks etdirəcək. Çünki qurultaya nümayəndələri rusların özləri seçirlər.
Məqalə müəllifi ilə əlaqə ünvanı: [email protected]
