Azərbaycan, Bakı, 03 iyun/ Trend , müxbir C.Babayeva/ Azərbaycanda mina qurbanlarına öz biznes fəaliyyətlərini təşkil etmək üçün faizsiz maliyyə vəsaiti ayrılacaq. Trend -un məlumatına əsasən, bu barədə çərşənbə axşamı jurnalistlərə Minalar Əleyhinə Azərbaycan Kampaniyası İctimai Birliyinin (MƏAK) sədri Hafiz Səfixanov məlumat verib.
Səfixanovun bildirdiyinə görə, keçən il mina qurbanlarına faizsiz maliyyə vəsaitinin ayrılması üçün pilot layihə həyata keçirilb. "Dörd region - Füzuli, Tərtər, Tovuz və Gəncə regionlarını əhatə edən pilot layihə 2006-cı ilin aprelindən 2007-ci ilin sentyabrına qədər həyata keçirilib. Layihə çərçivəsində hər region üçün 1500 avro vəsait ayrılmışdı. Layihədə 6 mina qurbanı iştirak etmişdi", - deyə o bildirib.
Səfixanovun sözlərinə görə, bu il mina qurbanlarına ayrılacaq vəsait artıralacaq. "Builki layihə çərçivəsində 2 regionun hər biri üçün 2500 avro ayrılacaq. Layihədə bu məbləğin konkret neçə nəfərə verilməsi göstərilmir", - deyə o qeyd edib.
Onun bildirdiyinə görə, mina qurbanı biznes sahəsini özü müəyyən edib biznes plan təqdim edir. "Mina qurbanına biznes fəaliyyəti ilə məşğul olmaq üçün nağd pul təqdim olunmur. Ayrılan vəsait nəzarət altında saxlanılır. Kredit bir il müddətinə verilir və kredit alan mina qurbanı bir il ərzində həmin vəsaitin yarısını qaytarmalıdır", - deyə İsaxanov bildirib.
Səfixanovun qeyd etdiyi kimi, layihənin donor təşkilatı İsveçrə Mina Qurbanlarına Yardım Fondudur.
Onun sözlərinə görə, layihənin həyata keçiriləcəyi regionlar hələ müəyyən olunmayıb. "Layihə artıq İsveçrə Mina Qurbanlarına Yardım Fondunun Direktorlar Şurasında ilkin müzakirədən keçib. Layihənin iyunun sonunda həyata keçirilməsi nəzərdə tutulub", - deyə o qeyd edib.
Trend -un arayışı: Minalar Əleyhinə Azərbaycan Kampaniyası İctimai Birliyi 1998-ci ildə yaradılıb, 2007-ci ildə Ədliyyə Nazirliyi tərəfindən dövlət qeydiyyatına alınıb. MƏAK-nin məlumatına əsasən, Azərbaycan mina qurbanlarının sayına görə Cənubi Qafqazda birinci yerdədir. Azərbaycanda mina qurbanlarının sayı 3000-nə yaxındır. Onların təxminən 450-500 nəfəri həlak olub.
Məqalə müəllifi ilə əlaqə saxlamaq üçün ünvan - trend