Azərbaycan, Bakı, 05 iyun / Trend , müxbir K.Zərbalıyeva/ Azərbaycanın Media Hüququ İnstitutu ölkədə medianın hüququ durumu ilə bağlı növbəti aylıq hesabatını açıqlayıb.
Sənəd 2008-ci ilin may ayında ölkə mediasında baş verənlərın statistika və şərhini əhatə edir.
Hesabatda may ayında media qanunvericiliyinə diqqətçəkən dəyişikliklərin edildiyi vurğulanır. Media Hüququ İnstitutu həmin dəyişikliklərin azad medianın daha da sıxışdırılmasına, media qanunvericiliyinin mürtəceləşdirilməsinə xidmət etdiyini bildirir.
Mediaya qarşı fiziki təhdidlər, basqılar bölümündə qeyd olunur ki, Azərbaycanda tənqidçi jurnalistlər öz həyatlarından və təhlükəsizliklərindən ehtiyatlanmaqda davam edirlər. Hökumət jurnalistlərə qarşı törədilmiş zorakılıq aktlarının, fiziki hədələrin obyektiv təhqiqatının aparılmasını təmin etmir.
"Azadlıq" qəzetinin 2008-ci ilin əvvəlki aylarında bir neçə dəfə basqına, ən müxtəlif formalarda təhqir və fiziki təzyiqlərə məruz qalmış əməkdaşı Aqil Xəlilə yenidən sui-qəsd cəhdi olub. "Azadlıq" qəzetinin daha bir əməkdaşı - Seymur Həziyev də basqı ilə üzləşib. Tənqidi yazılara son qoyulmasını istəyən naməlum şəxslər jurnalisti bir neçə dəfə ölümlə hədələyiblər.
Mart-aprel aylarında bir neçə əməkdaşı ölümlə təhdid olunan "Yeni Müsavat"qəzetinin redaksiyasının nəzarətə götürülməsi jurnalistlər arasında gərginlik, qorxu yaradıb.
Aprel ayında avtomobili yandırılan hərbçi jurnalist Üzeyir Cəfərovun polisə müraciəti də cavabsız qalıb.
Ötən ay Azadlıq Hərəkatçıları Birliyinin sədri kimi tanınan Təhmasib Novruzov "Azadlıq" qəzetini məhkəməyə verib. İddiaçı qəzetin qapadılmasını və kollektivin üzərinə 150 min AZN məbləğində ödənc yükü qoyulmasını tələb edir. "Gündəlik Bakı" qəzetinin Müdafiə Nazirliyinin hərbçisi tərəfindən məhkəməyə verilən baş redaktoru Habil Əliyevə isə həmin şikayətlə bağlı cinayət işi açılıb.
May ayında aşağı məhkəmə instansiyalarının jurnalistlər barəsində çıxardığı ağır məhkəmə qərar və hökmlərindən verilən şikayətlər təmin olunmayıb, jurnalistlərin qaldırdıqları iddialar rədd edilib.
Media Hüququ Institutu mayda mediaya qarşı iki iddianın təmin edilmədiyini vurğulayır. Sabiq səhiyyə naziri Əli İnsanovun şərəf və ləyaqətin müdafiəsi ilə bağlı hakimiyyətə yaxın olan "Lider" telekanalına və Azərbaycan Dövlət Televiziyasina qarşı iddialarını məhkəmə rədd edib.
Sənəddə həmçinin bildirilir ki, Milli Teleradio Şurası Azərbaycanın milli tezliyində yayımlanan 12 radio kanalın fəaliyyətini monitorinq edib. Monitorinqin yekunu olaraq "106 FM", "Antenn" və "Bürc FM" kanallarına xəbərdarlıq edilib.
Müəlliflə əlaqə saxlamaq üçün elektron ünvan - [email protected]