Azərbaycan,Bakı,17 iyun / Trend , müxbir K.Zərbalıyeva/ Azərbaycan Xalq Cəbhəsi Partiyasının sədrinin apellyasiya şikayəti üzrə çərşənbə axşamı Bakı Apellyasiya Məhkəməsində proses davam etdirilib.
Partiya sədri Əli Kərimlinin vəkili Elçin Qəmbərov prosesdə çıxış edib.
Hakim heyəti Kərimli barəsində açılmış cinayət işinin materiallarını Nəsimi rayon məhkəməsindən tələb edib.
Bu səbəbdən də proses iyulun 1-dək təxirə salınıb.
Partiya sədri Əli Kərimli, barəsindəki cinayət işinin xitam olunması barədə verdiyi şikayət üzrə Nəzimi rayon məhkəməsinin qərarının ləğv olunmasını xahiş edir.
Bakının Nəsimi rayon məhkəməsində AXCP sədri Əli Kərimlinin barəsində rayon prokurorluğunda 1994-cü ildə Cinayət Məcəlləsinin qanunsuz silah-sursat saxlama maddəsilə açılan cinayət işinə xitam verilməsi ilə bağlı şikayəti təmin edilməyib.
2006-cı ildə köhnə pasportunun müddəti bitdikdən sonra, Kərimli yeni pasport almaq üçün DİN Pasport Qeydiyyatı İdarəsinə müraciət edəndə ona bildirilib ki, haqqında Nəsimi rayon prokurorluğunda 1994-cü ildə Cinayət Məcəlləsinin qanunsuz silah-sursat saxlama maddəsilə açılan cinayət işinə xitam verilmədiyindən, ona pasport verilə bilməz.
Əli Kərimlinin vəkili Elçin Qəmbərov bildirib ki, cinayət-prosessual qanunvericiliyə görə, beş il müddətinə xitam verilməli olan bu cinayət işi 12 ildir açıq qalıb.
Nəsimi rayon məhkəməsi Kərimlinin şikayətini təmin etməmişdi.
Bu qərardan apellyasiya şikayəti verilmişdi və Apellyasiya Məhkəməsi Nəsimi rayon məhkəməsinin qərarını qüvvədə saxlamışdı.
Qərardan verilən kassasiya şikayətinə baxan Ali Məhkəmə işin cinayət icraatına aid olduğunu əsas gətirərək, şikayətə mülki mühakimə qaydasında baxılmalı olmadığından, Apellyasiya Məhkəməsinin qətnaməsini ləğv etmişdi.
Ali Məhkəmənin qərarı ilə, Kərimliyə məhkəmə nəzarəti qaydasında cinayət-prosessual qanunvericiliyin tələblərinə uyğun olaraq, şikayət verə bilməsi izah olunub.
Müəlliflə əlaqə saxlamaq üçün elektron ünvan - [email protected]
