Azərbaycan, Bakı, 31 iyul / Trend , müxbir A.Əliyev/ "Prezident İlham Əliyevin "Kütləvi informasiya vasitələrinin inkişafina dövlət dəstəyi Konsepsiyasi"nın təsdiq edilməsi və "Kütləvi informasiya vasitələrinə birdəfəlik maliyyə yardimi göstərilməsi" haqqında sərəncamları Azərbaycan mediasının inkişafını Azərbaycanın tərəqqisinə adekvat vəziyyətə gətirmək məqsədi daşıyır". Bunu Prezidentin İcra Aparatının ictimai-siyasi məsələlər şöbəsinin müdiri Əli Həsənov deyib.
Onun sözlərinə görə, Azərbaycanda müstəqil medianın inkişafı dövlət siyasətinin əsas prioritetlərindəndir. "Azərbaycan mediasının bugünkü vəziyyəti dövləti qane edə bilməz. Çünki son 5 ildə Azərbaycanda bütün sahələrdə müşahidə olunan tərəqqi fonunda müstəqil mətbuat inkişafı zəif gedib və onun maddi bazası həddindən artıq zəifdir" - deyən Əli Həsənov bildirib ki, Prezidentin müvafiq sərəncamı dünya informasiya məkanına daxil olan Azərbaycanda medianın inkişafına dövlət dəstəyini daha da artıracaq.
"Biz düşünürük ki, jurnalistlərin peşəkarlıgının yüksəldilməsi yalnız o zaman mümkün ola bilər ki, onların sosial vəziyyəti də yaxşı olsun" - deyən Prezidentin İcra Aparatının rəsmisi Konsepsiyanın müxtəlif jurnalist təşkilatları, xüsusən də Mətbuat Şurası ilə birlikdə bir daha müzakirə ediləcəyini bildirib. O deyib ki, Konsepsiyada mətbuatın inkişafına dəstək fondunun yaradılması da nəzərdə tutulub. Bu Fondun formalaşdırılması ilə baglı lazımi təkliflər hazırlanaraq, dövlət başçısına təqdim ediləcək.
Həsənov onu da bildirdi ki, Prezident İlham Əliyevin kütləvi informasiya vasitələrinə birdəfəlik maliyyə yardımı göstərilməsi haqqında sərəncamı isə, Mətbuat günü ilə baglı jurnalistlərə bir hədiyyədir.
Məqalə müəllifi ilə əlaqə saxlamaq üçün elektron ünvan [email protected]