Azərbaycan, Bakı, 15 yanvar / Trend , müxbir K.Zərbalıyeva/ Azərbaycanda vəkilliyə qəbul üçün elan olunmuş sənəd qəbulu yanvarın 31-də başa çatacaq.
Vəkillər Kollegiyasından cümə axşamı Trend -a verilən məlumata görə, vəkilliyə qəbul üçün sənəd qəbulu iyulun 15-dən başlayıb və indiyədək 453 nəfər sənəd verib.
Məlumata görə, namizədlərlə martda imtahanların keçirilməsi nəzərdə tutulub.
VK-nin sədr müavini Fərhad Nəcəfov bildirib ki, sənəd qəbulunun müddətinin yanvarın 31-dək uzadılmasının səbəbi əvvəliki imtahanlarda iştirak etmiş 15 nəfərin müsabiqədə yenidən iştirakı üçün müraciət etməsi olub.
Nəcəfovun sözlərinə görə, qanunvericilikdə nəzərdə tutulub ki, əvvəlki imtahanların bir mərhələsindən keçə bilməyən namizədin sonrakı müsabiqədə iştirakı üçün 1 il müddətin keçməsi və İxtisas Komissiyasının rəyi tələb olunur.
Sədr müavini bildirib ki, indiyədək əvvəki müsabiqədə iştirak etmiş 54 nəfərin ərizəsinə baxılıb və onların müsabiqədə iştirakına razılıq verilib.
Müsabiqə 2 mərhələdən ibarətdir. Birinci mərhələdə namizədlərlə test imtahanı keçirilir və onlar hüququn müxtəlif sahələrinə, məntiqə aid sualları cavablandırırlar. Bu mərhələdə 50 və daha çox bal toplamış namizəd müsabiqə mərhələsində iştirak etmək imkanı qazanır.
VK-yə üzvlük üçün sonuncu müsabiqə 2007-ci ildə keçirilib və müvəffəqiyyət qazanmış 241 namizəd vəkilliyə qəbul olunub.
Hazırda Azərbaycanda 725 vəkil var. Azərbaycanda əhalinin hər yüz min nəfərinə 5 vəkil düşür. Azərbaycan vəkillərin sayına görə, Avropa ölkələri sırasında sonuncu yerlərdə durur.
Son iki ildə 43 vəkil hakimliyə keçirilən imtahanlarda uğur qazanıb və hakim kimi fəaliyyətə başlayıb.
Almaniyalı ekspert Tomas Herman hesab edir ki, Azərbaycanda Vəkillər Kollegiyasına keçirilən qəbul imtahanları çox da şəffaf deyil. Amaniyalı ekspertin qənaətincə, ədalətli və obyektiv məhkəmə qərarının qəbul edilməsində peşəkar vəkillərin rolu var. "Azərbaycanda vəkillər hakimlərə keyfiyyətli məhkəmə qərarının qəbulunda kömək edə bilmirlər. Çox vaxt proseslərdə tərəflər keyfiyyətsiz vəkil yardımı ilə üzləşməli olur", - deyə Herman vurğulayıb.
ATƏT-in Azərbaycan məhkəmələrində 2006-2007-ci illərdə apardığı monitorinqlərin nəticəsində hazırladığı hesabatda qeyd olunur ki, cinayət işləri üzrə Vəkillər Kollegiyası tərəfindən göstərilən hüquqi xidmətlər minimal peşə standartlarına cavab vermir.
Hesabatda vurğulanır ki, Vəkillər Kollegiyasının rəhbərliyi öz üzvlərinin qayğısına qalan və peşəkarlıq səviyyəsini qaldıran səmərəli təşkilat yaratmaq üçün zəruri dəyişikliklər həyata keçirməyə meylli deyil.
Məqalə müəllifi ilə əlaqə ünvanı:[email protected]
