Azərbaycan, Bakı, 11 noyabr / Trend , müxbir H.Bağırov/
"Dedovşina"da təqsirləndirilən Azərbaycan Silahlı Qüvvələrinin hərbi qulluqçusunun apelyasiya şikayətinə baxılıb.
Trend -un məlumatına görə, çərşənbə günü Bakı Apelyasiya Məhkəməsində Ali Məhkəmənin qərarı əsasında hökmün Famil Qəniyevin barəsində olan hissəsinə yenidən baxılıb və Bakı Hərbi Məhkəməsinin çıxardığı hökm qismən dəyişdirilib. Qəniyevin barəsində 3 il 6 ay azadlıqdan məhrumetmə cəzası təyin edilib.
Bakı Hərbi Məhkəməsinin hökmü ilə Famil Qəniyevə 4 il 6 ay, Cabir Yusibova 4 il, Adil Abbasova 4 il, Rahid Cəfərov və Elxan Alməmmədovun hər birinə isə 3 il azadlıqdan məhrumetmə cəzası verilib.
Bakı Apelyasiya Məhkəməsi hökmün digər şəxslər barəsindəki hissəsini qüvvədə saxlayıb.
Trend -un arayışı: Ötən ilin oktyabrında İnternetdə hərbi hissənin tibb məntəqəsində müalicə alan əsgərlərin "dembel"lər (hərbi xidmətinin başa çatmasına az qalmış əsgər) tərəfindən döyüldüyü ilə bağlı görüntülər yayılıb. Hadisənin ötən ilin fevral ayında Müdafiə Nazirliyinin Ələtdəki hərbi hospitalında baş verdiyi bildirilir.
Bu məsələ ilə bağlı Respublika Hərbi Prokurorluğunda Cinayət Məcəlləsinin tabelik münasibətlərində olmayan hərbi qulluqçular arasında qarşılıqlı münasibətlərin nizamnamə qaydalarını pozma (332) maddəsi ilə cinayət işi açılmış və istintaq aparılmışdı.
İş üzrə 5 zərərçəkmiş məlum olub, onlardan dördü şikayətini geri götürüb.
Məqalə müəllifi ilə əlaqə ünvanı: [email protected]