...

Mənimsəmə və israf etməkdə ittiham olunan "Azəriqaz" QSC-nin vəzifəli şəxslərinin apellyasiya şikayətinə baxılıb

Cəmiyyət Materials 12 Yanvar 2010 17:14 (UTC +04:00)
Trend News-un məlumatına görə, bu gün Şirvan Apellyasiya Məhkəməsində “Azəriqaz” Qapalı Səhmdar Cəmiyyətinin Ağcabədi Qaz İstismar İdarəsinin rəisi Elman Gülmalıyev və idarənin əməkdaşı Oktay Həsənovun apellyasiya şikayəti üzrə qərar elan edilib.

Trend-i buradan izləyin

Azərbaycan, Bakı, 12 yanvar / Trend , müxbir H.Bağırov/

Mənimsəmə və israf etməkdə ittiham olunan "Azəriqaz" Qapalı Səhmdar Cəmiyyətinin vəzifəli şəxslərinin apellyasiya şikayətinə baxılıb.

Trend -un məlumatına görə, bu gün Şirvan Apellyasiya Məhkəməsində "Azəriqaz" Qapalı Səhmdar Cəmiyyətinin Ağcabədi Qaz İstismar İdarəsinin rəisi Elman Gülmalıyev və idarənin əməkdaşı Oktay Həsənovun apellyasiya şikayəti üzrə qərar elan edilib. Qərara görə, təqsirləndirilən şəxslərin apellyasiya şikayəti təmin edilməyib və Ağcabədi rayon Məhkəməsinin hökmü qüvvəsində saxlanılıb.

"Azəriqaz" Qapalı Səhmdar Cəmiyyəti tərəfindən Ağcabədi Qaz İstismar İdarəsinin maliyyə-təsərrüfat fəaliyyətinin audit yoxlanması nəticəsində aşkar edilən qaz sayğaclarının çatışmazlığı, abonentlərə artıq sərfiyyatın yazılması, real rəqəmlərin faktiki sayğac göstəricilərindən artıq olması, layihə-smeta sənədləri olmadan rayon ərazisində yerləşən bir sıra müəsisələrdə sayğaclar quraşdırılaraq onların təbii qazla qanunsuz təmin olunması faktları üzrə Baş Prokurorluq yanında Korrupsiyaya Qarşı Mübarizə İdarəsində cinayət işi başlayıb.

İstintaq zamanı müəyyən edilib ki, Ağcabədi Qaz İstismar İdarəsinin rəisi Gülmalıyev və Həsənov vəzifəli şəxs olmaqla ona etibar edilmiş özgəyə məxsus pul vəsaitini öz qulluq mövqeyindən istifadə etməklə mənimsəmə yolu ilə talamış, xidməti səlahiyyətlərinin hüdudlarından aşkar surətdə kənara çıxan hərəkətlər etməklə dövlət orqanının qanunla qorunan mənafelərinə mühüm ziyan vurmuşlar.

Gülmalıyev qeyd edilən vəzifədə işlədiyi müddət ərzində 32 nəfər yeni abonentdən 2007-ci ildə evlərinə məişət qaz sayğaclarının quraşdırılmasına görə idarənin hesabına mədaxil etmək üçün qəbul etdiyi pul vəsaitini öz qulluq mövqeyindən istifadə etməklə mənimsəyib.

Həmçinin 2008-ci ildə yeni abonentlərə məişət qaz sayğaclarını onların öz vəsaiti ilə alınaraq quraşdırmalı olduğu halda, idarənin vəsaiti hesabına 39 ədəd məişət qaz sayğacı alınması barədə qanunsuz göstəriş verməklə idarənin hesabından nəqd şəkildə pul vəsaiti çıxararaq mənimsəyib.

Ağcabədi rayon məhkəməsinin hökmü ilə Gülmalıyev 3 il 6 ay müddətinə azadlıqdan məhrum edilib. Həsənov isə 500 manat cərimələnib.

Təqsirləndirilən şəxslər Cinayət Məcəlləsinin mənimsəmə və israf etmə (179.2.3), vəzifə səlahiyyətlərindən sui-istifadə etmə (308.1), vəzifə səlahiyyətlərini aşma (309.1), vəzifə saxtakarlığı (313) maddələri ilə ittiham olunublar.

"Azəriqaz" QSC sonradan ARDNŞ-yə verilərək "Azəriqaz" İstehsalat Birliyi kimi yenidən qurulub.

Xəbər lenti

Xəbər lenti