Azərbaycan, Bakı, 29 aprel /Trend, müxbir K.Zərbalıyeva/
Azərbaycan Konstitusiya Məhkəməsinin sədri Fərhad Abdullayevin Trend-ə müsahibəsi
- İndiyədək Konstitusiya Məhkəməsinə verilən müraciətlər sırasında bələdiyyə aktlarından şikayətlər yoxdur. Bu nə ilə bağlıdır?
- Azərbaycanın Konstitusiyasında və "Konstitusiya Məhkəməsi haqqında" qanununda bələdiyyə aktlarından Konstitusiya Məhkəməsinə şikayət nəzərdə tutulub. Konstitusiya Məhkəməsi bələdiyyə aktlarının Konstitusiyaya, qanunlara, Prezidentin fərmanlarına, Nazirlər Kabinetinin qərarlarına uyğunluğunu yoxlayır. Bu, Azərbaycan üçün yeni institutdur. İndiyədək bələdiyyə aktlarından Konstitusiya Məhkəməsinə yalnız bir şikayət daxil olub. O da hüquqi baxımdan Konstitusiya Məhkəməsinə aid olmadığından, şikayətə baxılmasından imtina etmişik. Burada bir neçə məqam var. Ədliyyə Nazirliyi bələdiyyələrin fəaliyyətinə nəzarəti həyata keçirir.
Ola bilsin ki, bələdiyyə aktları ilə bağlı problemlər müəyyən mərhələdə aradan qaldırılır. Əgər belə bir şikayət olarsa, Konstitusiya Məhkəməsi tərəfindən həmin şikayət araşdırılacaq. Belə bir şikayət olmadığından, bələdiyyə aktları ilə bağlı hansı problemlərin olduğunu analiz etmək mümkün deyil.
- Konstitusiya Məhkəməsinin 15 qərarında Milli Məclisə tövsiyələr verilib. Amma indiyədək həmin tövsiyələrin bir qismi nəzərə alınmayıb, həmin tövsiyələrə uyğun Milli Məclis tərəfindən qanunvericiliyə dəyişiklik edilməyib.
- Konstitusiya Məhkəməsi tərəfindən Milli Məclisə verilmiş tövsiyələrin 10-u artıq icra olunub. Digərləri icraolunma mərhələsindədir. Bir qism tövsiyə isə qanunvericilikdə dəyişiklik olduğu üçün əhəmiyyətini itirib. Bir neçə tövsiyə var ki, onlar hələ də icra olunmayıb. Konstitusiya Məhkəməsinin bir neçə qərarında yeni qanun qəbul olunanadək münasibətlərin nizamlanması məqsədilə qaydalar müəyən edilib. Milli Məclis tərəfindən yeni qanun qəbul edilənədək həmin münasibətlər Konstitusiya Məhkəməsinin müəyyən etdiyi qaydalarla tənzimlənir. Bu qaydalar qanunvericiliyə müvafiq dəyişiklik edilənədək qüvvədədir. Bu, beynəlxalq konstitusiya nəzarəti orqanlarında qəbul edilmiş prosedurdur.
- Azərbaycanda praktikada hüquqşünas kadrların çatışmazlığı probleminin olması barədə rəsmi şəxslər tərəfindən fikirlər söylənilib. Hüquqşünas kadrların çatışmazlığı problemi aktualdırmı?
- Hüquqşünas kadrların çatışmazlığı problemi hər zaman olub. Son vaxtlar hüququn tədris prosesi və hazırlıq prosesi sahəsində islahatlar aparılır. Artıq Ədliyyə Akademiyası fəaliyyətə başlayıb. Dövlətin müvafiq qurumlarında işə başlayacaq hüquqşünaslar, hakimlər, prokurorlar, vəkillər Ədliyyə Akademiyasında 2 il təcrübə keçməlidirlər. Əgər əvvəllər kadrlar hüquqşünas peşəsinə heç bir hazırlıq keçmədən qəbul edilirdisə, indi belə olmayacaq. Fikrimcə, Ədliyyə Akademiyasında hüquqşünas kadrların tədrisi bu sahədəki problemlərin həllində əhəmiyyətli rol oynayacaq. Hüquqşünas diplomu alan çox ola bilər, amma onların hamısı işləmək üçün hazır deyil.