Azərbaycanda Şopen adına gənc pianoçuların festivalı keçiriləcək
Azərbaycan, Bakı, 7 may /Trend, müxbir S.Ağayeva/
Azərbaycanda Polşanın Azərbaycandakı səfirliyi və Azərbaycan Mədəniyyət və Turizm Nazirliyinin təşkilati dəstəyi ilə Frederik Şopen adına gənc pianoçuların festivalı keçiriləcək.
Dahi Polşa bəstəkarının 200 illiyinə həsr olunmuş festival mayın 11-13-də keçiriləcək. Festivalda Bakının musiqi və incəsənət məktəblərinin şagirdləri çıxış edəcəklər. Bu barədə səfirliyin məlumatında deyilir.
Polşa səfirliyi ən yaxşı ifaçının və onun müəlliminin Varşavaya beynəlxalq konkursa səfərini təşkil edəcək.
Dinləmələr mayın 11-12-də Əhməd Bakıxanov adına 6 saylı Uşaq musiqi məktəbində keçiriləcək. Laureatların konserti mayın 13-də Beynəlxalq Muğam Mərkəzində baş tutacaq.
