Azərbaycan, Bakı, 4 noyabr /Trend, müxbir K.Zərbalıyeva/
Bakı nikah evinin rəhbəri nikah müqaviləsinin məcburi bağlanılması ilə bağlı qanunvericiliyə dəyişiklik edilməsinin tərəfdarı deyil.
Bakı nikah evinin müdiri Həqiqət Səlimova Trend-ə bildirib ki, nikah müqaviləsinin məcburi olması ilə bağlı qanunvericiliyə dəyişiklik edilməsi bu sahədə istənilən nəticənin əldə olunmasına kömək etməyəcək.
"Nikah müqaviləsinin məcburi bağlanılmasının tərəfdarı deyiləm. Mentalitetimizdə də nikaha girən şəxslərin əvvəlcədən müqavilə bağlaması qəbul olunmur. Vətəndaşlar arasında nikah müqaviləsinin bağlanmasına marağın artması üçün maarifləndirməyə ehtiyac var. Nikah müqaviləsinin müsbət tərəfləri düzgün çatdırılmalı, boşanmanın sivil yolu barədə əhaliyə geniş məlumat verilməlidir", - Səlimova vurğulayıb.
Ailə, Qadın və Uşaq Problemləri üzrə Dövlət Komitəsi nikah müqaviləsinin bağlanmasının məcburiləşdirilməsi ilə bağlı Ailə Məcəlləsinə dəyişiklik edilməsi təklifi ilə çıxış edib.
Ailə Məcəlləsi nikah müqaviləsinin bağlanmasını nəzərdə tutsa da, bu, məcburi deyil. Müqavilənin məcburi bağlanmasının tərəfdarı olan millət vəkilləri hesab edirlər ki, müqavilə məcburi olmadığına görə, məcəllənin bu müddəası da işlək deyil.
Nikah müqaviləsi nikaha daxil olan şəxslər arasında bağlanan, nikah dövründə və ya nikah pozulduqda ər ilə arvadın əmlak hüquqlarını və vəzifələrini müəyyən edən sazişdir. Nikah müqaviləsi yazılı formada bağlanır və notariat qaydasında təsdiq olunur. Nikah müqaviləsində tərəflərin bir-birini qarşılıqlı saxlaması, bir-birinin gəlirlərində iştirak üsulları, hər birinin ailə xərclərində iştirak qaydası ilə bağlı hüquq və vəzifələri, nikah pozulduqda hər birinə düşəcək əmlakı müəyyənləşdirmək hüququ nəzərdə tutulur.
Nikah müqaviləsi ər ilə arvadın mövcud olan və gələcəkdə əldə edəcəkləri əmlaka dair bağlana bilər. Nikah müqaviləsi nikaha qədər və nikahdan sonra da bağlana bilər. Müqavilə nikaha qədər bağlansa da, bu nikah qeydə alındığı gündən qüvvəyə minir. Müqavilədə əmlakın hüquqi rejimi müəyyən olunur.
Bakı nikah evinin rəhbəri deyir ki, gənclər ailə qurmazdan öncə nikah müqaviləsinin şərtlərini razılaşdırmalı, öz vəzifələrini dəqiqləşdirməlidirlər.
Səlimova bildirib ki, təcrübədə nikaha girənlərin müqavilə bağlaması ilə bağlı hallara çox az rast gəlinir. Onun sözlərinə görə, nikah müqaviləsinin bağlanması barədə ailə qanunvericiliyində müddəa olsa da, vətəndaşlar nikah müqaviləsi bağlamağa maraqlı deyillər.
"Hətta, əcnəbilər Azərbaycan vətəndaşları ilə nikaha girəndə qızlarımız nigah müqaviləsinin bağlanmasına maraq göstərmirlər. Onlar özlərini o qədər xoşbəxt sayırlar ki, bu məsələyə qayıtmaq istəmirlər. Onların əsas məqsədi xarici ölkəyə getmək, orada yaşamaqdır. Fikirləşirlər ki, nikah müqaviləsinin bağlanması barədə tələb irəli sürsələr, qarşı tərəf ailə qurmaq fikrindən daşınar", - Səlimova vurğulayıb.
Nikah evinin rəhbəri bildirib ki, vətəndaşlarda nikah müqaviləsi ilə bağlı yanlış məlumat formalaşıb. Onun sözlərinə görə, əksəriyyət elə başa düşür ki, nikah müqaviləsində var-dövlətin, əmlakın bölüşdürülməsindən söhbət gedir.
"Əslində müqavilədə nikah müddətində və nikahdan sonra ər-arvadın hüquq və vəzifələri öz əksini tapır. Nikah müqaviləsi ayrılmanın sivil yoludur. Ayrılanda tərəflər bir-biri ilə düşmən olmamalıdır. Valideynlər boşanarkən uşaqlardan öz məqsədlərinə çatmaq üçün vasitə kimi istifadə etməməlidirlər. Müqavilə bütün bu məsələləri tarazlaşdıran bir sənəddir", - Səlimova deyib.
Onun sözlərinə görə, məhkəmələrdə baxılan mülki mübahisələrin böyük qismi ailə münaqişəsi nəticəsində yaranır və əmlak xarakterlidir. Səlimova hesab edir ki, nikah müqaviləsinin bağlanması ilə məhkəmələrin iş yükü də azalar.
Səlimova nikah müqaviləsinin bağlanması ilə bağlı maarifləndirmə işlərinin Vətəndaşlıq Vəziyyəti Aktlarının Qeydiyyatı orqanlarının üzərinə qoyulmasını düzgün hesab etmir.
Bu işin VVAQ orqanlarının səlahiyyətində olmadığını diqqətə çatdıran Səlimova bildirib ki, nikah müqaviləsinin bağlanması ilə bağlı nikaha girənlərə məsləhət veriləndə sərt reaksiya ilə qarşılaşırlar.
"VVAQ orqanları nikah müqavilələrinin bağlanması ilə bağlı maarifləndirmə işləri aparmamalıdır, bu bizim səlahiyyətimizdə deyil. VVAQ orqanlarından çox şey tələb edirlər. Biz nikaha girənlərə müqavilə bağlanması ilə bağlı məsləhət verəndə "Sizin nə marağınız var? Bizi müqavilə bağlamağa niyə məcbur edirsiniz?" deyə sərt cavab verirlər. VVAQ orqanlarını bu işdə ittiham edənlər çox böyük səhv edirlər. Nikaha girənlər hesab edirlər ki, müqavilənin bağlanmasını məsləhət görməklə onların ailəsində problemlər yaradırıq, söz-söhbət salırıq", - Bakı nikah evinin rəhbəri bildirib.