Azərbaycanda dövlət qeydiyyatından keçməyən dini qurumların bir çoxunun problemi sənədlərlə bağlıdır - komitə sədri
Azərbaycan, Bakı, 15 dekabr /Trend, müxbir M.Əliyev/
Azərbaycanda dövlət qeydiyyatından keçməyən dini qurumların bir çoxunun problemi yalnız sənədlərlə bağlıdır. Bunu Trend-ə çərşənbə günü Milli Məclisin İnsan hüquqları komitəsinin sədri Rəbiyyət Aslanova bildirib.
"Qeydiyyatdan keçməyən dini qurumların nümayəndələri ilə görüşdə məlum oldu ki, onların dövlət qeydiyyatından keçməməsinin əsas səbəbi qeydiyyat sənədlərini düzgün hazırlayıb Dini Qurumlarla İş üzrə Dövlət Komitəsinə təqdim etməmələridir", - Aslanova bildirib.
Azərbaycanda bir qrup dini icmanın qeydiyyata alınmamaları ilə bağlı Milli Məclisə müraciətinə əsasən, parlamentin İnsan hüquqları komitəsinin sədri həmin dini icmaların nümayəndələri ilə görüş keçirib.
Aslanova bildirib ki, dini qurumların nümayəndəli etiraf ediblər ki, sənədləri düzgün tərtib etməmələri bəzilərinin qanunu bilməməyindən, digərlərinin isə həmin sənədlərin təqdimatına gecikmələrindən irəli gəlir.
"Dini etiqad azadlığı haqqında" qanuna 2009-cu ildə edilmiş dəyişikliklərə əsasən dini icmalar yenidən qeydiyyatdan keçməli idilər.
Komitə tərəfindən qeydiyyata alınan dini icmaların sayı 510-a çatıb. Bunlardan 493-ü islam, 9-u xristian, 6-sı yəhudi, 1-i krişna, 1-i isə bəhai olmaqla, 17-si qeyri-islam təmayüllü icmalar olub.
Azərbaycanda dini icmaların təkrar qeydiyyatı 2009-cu ilin noyabrında başlanılıb. İlk qeydiyyat şəhadətnaməsi keçən ilin noyabrın 24-də Qafqaz Müsəlmanları İdarəsinə verilib.
"Biz hüquqi dövlətdə yaşayırıq və hər şey qanunlarla tənzimləndiyindən görüş zamanı qərara gəlinib ki, həmin dini icmalar öz sənədlərini tələb olunan qaydada hazırlayaraq Dini Qurumlarla iş üzrə Dövlət Komitəsinə təqdim etsin", - komitə sədri bildirib.
