Azərbaycan, Bakı, 6 yanvar /Trend, müxbir M. Əliyev/
Azərbaycanda dekabrın 1-dən quş ovuna bir aylıq müvəqqəti qoyulan qadağanın müddəti daha bir ay uzadılıb. Bu barədə cümə axşamı Trend-ə Ekologiya və Təbii Sərvətlər Nazirliyinin mətbuat xidmətinin rəhbəri İradə İbrahimova məlumat verib.
Mətbuat xidmətinin rəhbəri bildirib ki, qadağanın uzadılması Azərbaycan ərazisində "quş qripi" xəstəliyinın (H1N1 virusu) qarşısının alınması üçün qabaqlayıcı tədbirlərin görülməsi məqsədi daşıyır.
Onun sözlərinə görə, Cənub-Şərqi Asiyadan Azərbaycana vəhşi quşların miqrasiya etməsi, Gürcüstan və Türkiyənin isə ölkəmizlə həmsərhəd olması xəstəliyin hər an ölkəyə daxil olma ehtimalını artırır.
"Quş ovu üçün nazirliyin ərazi şöbələrinə ayrılmış ov icazələrindən istifadənin hüquqi qüvvəsi daha bir ay müddətinə dayandırılıb", - İbrahimova deyib.
Ovçuların çoxsaylı müraciətləri nəzərə alınaraq, 2010-cu il noyabrın 5-də ölkə ərazisində su-bataqlıq quşlarının ovu açıq elan edilmişdi.
