...

Azərbaycanın müxalifət partiyasının sədri barəsində istintaq yekunlaşıb

Cəmiyyət Materials 4 Aprel 2011 15:03 (UTC +04:00)
Azərbaycan Milli Dövlətçilik Partiyasının (AMDP) sədri Nemət Pənahlı barəsindəki cinayət işinin istintaqı yekunlaşıb.
Azərbaycanın müxalifət partiyasının sədri barəsində istintaq yekunlaşıb

Azərbaycan, Bakı, 4 aprel /Trend, müxbir K.Zərbalıyeva/

Azərbaycan Milli Dövlətçilik Partiyasının (AMDP) sədri Nemət Pənahlı barəsindəki cinayət işinin istintaqı yekunlaşıb.

Pənahlının vəkili Samir İsayev bazar ertəsi Trend-ə bildirib ki, özü və hüquqlarını müdafiə etdiyi şəxs cinayət işinin materialları ilə tanış olub.

Vəkil bildirib ki, bəzi istintaq hərəkətləri ilə bağlı münasibətlərini günün sonuna kimi vəsatət şəklində müstəntiqə təqdim edəcək.

İsayev yaxın günlərdə iş materiallarının ittihamın təsdiq olunması üçün prokurorluğa göndəriləcəyini deyib.

Bildirib ki, Pənahlıya əlavə ittihamlar verilməyib və cinayət işi baxılması üçün Nəsimi rayon məhkəməsinə göndəriləcək.

Yanvarın 7-də, gecə 21:20 radələrində Bakı şəhər sakini Eldəniz Rzayev mobil telefonu ilə DİN-in 102 xidmətinə zəng edərək Nəsimi rayonu, Mirəli Qaşqay küçəsində Nemət Pənahlı və Ceyhun Fərzullayev tərəfindən hədələndiyi, o cümlədən döyüldüyü barədə məlumat verib.

Onun məlumatı əsasında Pənahlı və Fərzullayev saxlanılıb.

Saxlanılanlar barəsində Cinayət Məcəlləsinin 221.3-cü (xuliqanlıq, silahdan və ya silah qismində istifadə edilən əşyaları tətbiq etməklə törədildikdə) maddəsi ilə cinayət işi başlanıb.

Onlar barəsində Nəsimi rayon məhkəməsi tərəfindən yanvarın 10-da 2 ay müddətinə həbs qətimkan tədbiri seçilib.

Daxili İşlər Nazirliyinin məlumatına görə, araşdırma zamanı məlum olub ki, insident maşın alqı-satqısı ilə bağlı yaranan mübahisə zamanı baş verib.

Döyülən şəxs Pənahlıdan maşın alıb. Hadisə baş verən gün Mirəli Qaşqay küçəsində həmin maşında texniki nasazlıq yaranıb. Rzayev Pənahlıya zəng edərək avtomobilin xarab olduğunu bildirib. Bundan sonra Pənahlı Rzayevlə görüşüb və aralarında yaranan mübahisə zamanı Pənahlı onu dəmir parçası ilə döyüb.

Nazirlik Pənahlının həbsinin Azərbaycan İslam Partiyasının sədrinin həbsi ilə əlaqəli olması barədə bəzi KİV-lərdə yayılan məlumatları təkzib edir.

Xəbər lenti

Xəbər lenti