Azərbaycan, Bakı, 25 noyabr /Trend/
Bölgələrdə bankomatların sayının artmasına ciddi ehtiyac var. İnsanlar, xüsusilə də pensiyaçılar bölgələrdə bankomat azlığının yaratdığı problemlərdən əziyyət çəkirlər. Trend-in məlumatına görə, bunu "Azərbaycan Respublikasının Dövlət Sosial Müdafiə Fondunun 2012-ci il büdcəsi haqqında" qanun layihəsinin müzakirəsi zamanı millət vəkili Qənirə Paşayeva deyib.
Onun sözlərinə görə, bankomatlarla bağlı tenderi keçirən və banklar qarşısında bu məsələni qaldıran qurum Dövlət Sosial Müdafiə Fondudur.
"Böyük kəndlərdə və ya bu kəndləri birləşdirən 10 minlərlə əhalisi olan ərazilərdə bir çox hallarda 1 bankomat belə yoxdur. İnsanlar rayon mərkəzinə getmək üçün 10 km-lərlə yol getmək məcburiyyətində qalırlar. Bəzən isə pensiyalarını ala bilmək üçün bir neçə dəfə gedib gəlməli olurlar ki, bu da onlar üçün problem yaradır. Çünki pensiyaçıların pensiyalarının nə vaxt kartlarında olmasından dəqiq xəbərləri olmur", - Paşayeva deyib.
Millət vəkili bildirib ki, növbəti tender zamanı banklar qarşısında bankomatların sayının artırılması ilə bərabər, vəsait daxil olan kimi pensiyaçılara "sms" vasitəsilə məlumatların verilməsi şərti də qoyulmalıdır. Qənirə Paşayeva bildirib ki, beynəlxalq praktikada da istifadə olunan bu metod pensiyaçıların uzaq məsafələrdən bir neçə dəfə bankomata gəlib-getmək kimi problemlərini aradan qaldıra bilər.
Millət vəkilli bildirib ki, digər bir problem Dövlət Sosial Müdafiə Fondunun elan etdiyi tenderdə qalib gələn banklar arasında "interfeys" sisteminin olmamasıdır. Bunun nəticəsində fərqli banklardan pensiya alanda pensiyaçılardan faiz tutulur. Banklar arasında pensiya alınması sahəsində bu fərqlərin aradan qaldırılması yaxşı olardı. Millət vəkili təklif edib ki, Fondun gələn ilin əvvəlində elan etdiyi tenderdə bu şərt öz əksini taparsa, pensiyaçıları bununla bağlı narahat edən problemlər də öz həllini tapa bilər.
Dövlət Sosial Müdafiə Fondunun sədri Səlim Müslümov millət vəkili Qənirə Paşayevanın səsləndirdiyi təkliflərin əksəriyyəti ilə razılaşıb və bildirib ki, növbəti tender zamanı bu şərtlərin çoxu banklar qarşısında irəli sürüləcək.