Azərbaycan, Bakı, 20 fevral /Trend, müxbir E.Mehdiyev/
Azərbaycan internetin sürətinə görə Mərkəzi Asiya və MDB ölkələri arasında lider sırasında olmaqla, internetin əlçatımlılığına görə 20-ci, sosial şəbəkələrdə fəallığa görə isə 41-ci yerdədir. Trend-in məlumatına görə, bunu Müəllif Hüquqları Agentliyinin sədri Kamran İmanov "İnternetdə müəllif hüquqları: perspektivlər və problemlər" mövzusunda keçirilən beynəlxalq forumda çıxışı zamanı deyib.
K.İmanov qeyd edib ki, Dünya İqtisadi Forumunun (DİF) Rəqabətlilik Hesabatında Azərbaycan rəqabətlilik indeksinə görə 39-cu yerdə qərarlaşıb.
Onun sözlərinə görə, ölkə "insan kapitalı" indeksinə görə 64-cü, innovasiya göstəricisinə görə 51-ci, "texnoloji səviyyəsinə" görə 50-ci, "innovasiya potensialı" komponentinə görə 35-ci, "qabaqcıl texnologiyaların dövlət satınalmasına" görə 14-cü yerləri tutub. K.İmanov bildirib ki, bu göstəricilər MDB məkanında lider mövqelərdir.
K.İmanov həmçinin Azərbaycanda piratçılığın səviyyəsi və bu sahədə görülən işlər barədə danışıb. Onun sözlərinə görə, Azərbaycan piratçılığa qarşı beynəlxalq səviyyədə mübarizənin fəal iştirakçılarından biridir.
K.İmanov qeyd edib ki, görülən tədbirlər nəticəsində ölkədə kitab nəşrində piratçılığın səviyyəsi 2005-ci illə müqayisədə 61%-dən 30%-ə, audio-video məhsul bazarında 90%-dən 67%-ə, proqram təminatında 96%-dən 87%-ə düşüb.
O bildirib ki, ötən il 13 müəllifin 21 əsəri elektron qaydada qeydiyyatdan keçirilib və əsərin qeydiyyatı haqqında 21 şəhadətnamə verilib.
K.İmanov əlavə edib ki, 1996-cı ildən indiyədək agentlikdə 9 mindən çox əsər və əlaqəli hüquqların obyektləri qeydiyyatdan keçirilib.
Onun sözlərinə görə, araşdırmalar göstərir ki, davamlı inkişaf Solou iqtisadi-riyazi modelində texnoloji tərəqqi və insan bilikləri göstəricisi son 10 ildə 13% artaraq 22%-ə qədər yüksəlib: "Müəlliflik hüququ və əlaqəli hüquqlara əsaslanan, "kreativ iqtisadiyyat"ın ölkənin ÜDM-dəki payı 2003-cü ildə 2,1%-dən artaraq 2012-ci ildə 4,6%-ə çatıb və hazırda inkişaf etmiş ölkələr sırasındadır. Son illərin hesabatlarına əsasən, Azərbaycan əqli mülkiyyət sahəsində Cənubi Qafqazda ən qabaqcıl dövlət kimi təqdim olunur".
...