...

Quba-Qonaqkənd yolunun yenidən qurulması turizmə necə təsir edəcək?

Cəmiyyət Materials 10 Dekabr 2021 11:28 (UTC +04:00)
Quba-Qonaqkənd yolunun yenidən qurulması turizmə necə təsir edəcək?

Bakı. Fərid Zöhrabov - Trend:

Quba-Qonaqkənd istiqaməti şimal rayonlarında turizm üçün ən vacib istiqamətlərindən biridir.

Məsələ ilə bağlı Trend-ə açıqlama verən turizm eksperti Kənan Hənifəyev bildirib ki, son illər şimal turizmi üzrə əsasən Şahdağ Qış-Yay Turizm Kompleksi daha çox populyarlıq qazanıb: "Düşünürəm ki, Quba–Qonaqkənd avtomobil yolunun tikintisinin yekunlaşması turizmə öz töhfəsini verəcək. Çünki bu istiqamət turistlərin sevimli istirahət edə biləcək yerlərdən biridir. Qonaqkəndin abadlaşdırılması və gələcəkdə infrastrukturlaşdırılmasi turist axının daha artmasına səbəb olacaq. Quba şəhəri turizmin çox istiqamətli destinasiyasıdır. Burada tarixi, mədəni, ekoloji, təbiət və qastronomiyaya aid turların təşkili turistlərin böyük marağına səbəb olur", - deyə K.Hənifəyev bildirib.

Qeyd edək ki, Azərbaycan Respublikasının Prezidenti İlham Əliyev dekabrın 6-da Quba-Qonaqkənd avtomobil yolunun açılışını edib.

Trend xəbər verir ki, 46 kilometrlik Quba-Qonaqkənd avtomobil yolunun istismara verilməsi ilə 68 min nəfərin rahat gediş-gəlişi təmin olunur.

Bu yol uzun illər əsaslı təmir olunmadığı üçün hərəkət hissəsində qabarmalar, çalalar əmələ gəlmişdi. Bu isə yolda nəqliyyatın hərəkətini çətinləşdirirdi.

Qeyd edək ki, ərazinin özünəməxsus relyefi tikinti işlərinin gedişinə də birbaşa təsir göstərib. Bəzi yerlərdə dağ yamaclarının qaya süxurları kəsilib, qrunt sularının axıdılması təmin edilib. Bir sözlə, dövlətimizin başçısının sərəncamı ilə vətəndaşların rahatlığının təmin olunması üçün çox əhəmiyyətli işlər görülüb.

Onu da deyək ki, Quba-Qonaqkənd yolunun yenidən qurulması həm də əhalinin tədarük etdiyi kənd təsərrüfatı məhsullarını, meyvə-tərəvəzi qısa vaxtda istədikləri ünvana çatdırmağa imkan yaradır, həmçinin turizm imkanlarını daha da genişləndirir.

Məqalədə:
Xəbər lenti

Xəbər lenti