Bakı.Trend:
Sahibkarların hüquqlarının bərpası Ombudsmanın fəaliyyətində prioritetlərdəndir.
Sahibkarların hüquqlarının məhkəmə müdafiəsinin effektivliyinin artırılması məqsədi ilə kommersiya məhkəmələrinin yaradılması, kassasiya və apellyasiya instansiyalarında aidiyyəti kollegiyaların təşkili bunun bariz nümunəsidir.
Trend xəbər verir ki, bunu bu gün Azərbaycanın İnsan Hüquqları üzrə Müvəkkili (Ombudsman) Səbinə Əliyeva "Femida Dialoq Platforması sahibkarlarla görüş" adlı tədbirdə çıxışı zamanı deyib.
"Yüksək hüquqi statusu konstitusiya ilə müəyyən edilən Azərbaycanın Ali Məhkəməsi öz növbəsində bu sahədə kassasiya qaydasında ədalət mühakiməsini həyata keçirməklə yanaşı, vahid məhkəmə təcrübəsinin formalaşdırılmasına, qanunvericiliyin təkmilləşdirilməsinə, bununla da insan hüquq və azadlıqlarının səmərəli təmininə əvəzsiz töhfələrini verir. İstər azad sahibkarlıq hüququnun təmini və sahibkarların pozulmuş hüquqlarının bərpası məsələləri, istərsə də sahibkarlıq fəaliyyəti zamanı insan hüquq və azadlıqlarının müdafiəsi problemləri Ombudsmanın fəaliyyətinin prioritet istiqamətlərini təşkil edir”, - Ombudsman qeyd edib.
S.Əliyeva bildirib ki, müraciətlərin araşdırılması, analitik
təhlillər, maarifləndirmə işinin təşkili və qanunvericiliyin
təkmilləşdirilməsi istiqamətində həyata keçirilir.
“Ötən dövr ərzində normativ hüquqi akt layihələrinə dair təqdim
etdiyimiz bir çox rəy və təkliflər nəzərə alınıb ki, bu da müvafiq
sahələr üzrə boşluqların aradan qaldırılmasına, funksional və
normativ problemlərin həllinə imkan verib”,- deyə o qeyd edib.