Azərbaycanın Səhiyyə Nazirliyi Xanlar rayonunda xəstəxananın inşası üzrə tender elan edib. Trend in xəbər verdiyi kimi, 180 çarpayılıq xəstəxana 2007-ci il noyabrın sonunadək hazır olmalıdır.
Tenderdə iştirak etmək istəyənlər avqustun 30-dək 1200 AZN köçürməli və öz təkliflərini təqdim etməlidir. Tender proseduru sentyabrın 3-də keçiriləcək.
Səhiyyə Nazirliyi bu işləri 2006-2007-ci illərdə Bakı qəsəbələrinin sosial-iqtisadi inkişafına dair tədbirlər planı çərçivəsində həyata keçirir. Tədbirlər planına əsasən, Badamdar qəsəbəsində 25 çarpayılıq uşaq xəstəxanası, Kişlədə uşaq poliklinikası, Şüvəlanda 5 saylı uşaq vərəm dispanserində isə 50 çarpayılıq əlavə otaqlar inşa ediləcək.
Bu il 2006-cı il üçün investisiya proqramı çərçivəsində Bərdədə 60 və 25 çarpayılıq uşaq xəstəxanalarının inşası başa çatacaq. Bütün tikinti işləri dövlət vəsaiti hesabına həyata keçiriləcək.