Bakı. Trend:
InvestAZ İnvestisiya şirkətinin analitikləri bu həftə üzrə dünya maliyyə bazarlarında son vəziyyət və qısa müddət ərzində gözlənilənlərlə bağlı məlumat verib.
Trend həmin məlumatı təqdim edir:
EUR
Dünya valyuta birjalarında EUR/USD məzənnəsi ucuzlaşaraq, 1.2300$-ın altında ticarət edilməkdədir. Təhlillərə əsasən, qiymət 1.2228$-ı da aşağı istiqamətdə qıraraq, altında qalarsa, eniş dalğası 1.2154$ və 1.2075$-a kimi də sürətlənə bilər.
Qeyd etmək lazımdır ki, avronun ucuzlaşmasına Avropa iqtisadiyyatı ilə bağlı fundamental göstəricilərin zəifləməsi təsir edir.
Eyni zamanda, çərşənbə axşamı Bakı vaxtı ilə saat 12:00-da Almaniyadan açıqlanacaq iqtisadi mühit indeksi və cümə günü saat 16:30-da ABŞ-dan yayımlanacaq birinci rüb üzrə iqtisadi inkişaf göstəriciləri də investorların diqqət mərkəzindədir.
GBP
GBP/USD məzənnəsi də keçən həftə ərzində 1.3992$-a kimi 3%-ə kimi ucuzlaşıb. Burada da qiymət 1.3984$-ı aşağı istiqamətdə qıraraq, altında qalarsa, ucuzlaşmanın 1.3742$-a kimi də davam edəcəyi proqnozlaşdırılır.
Maliyyə bazarlarında İngiltərə Mərkəzi Bankının növbəti faiz qərarı fonunda artım gözləntilərinin zəifləməsi, funt sterlinqin də ucuzlaşmasına təsir edir.
TRY
Türkiyə bazarlarında da dollar proqnozlaşdırıldığı kimi 4.00TL-ə kimi ucuzlaşdıqdan sonra yenidən bahalaşmağa başlayıb. Hal-hazırda 4.06TL-nin üzərində təklif edilən USD/TRY məzənnəsi, 4.07TL-ni də yuxarı istiqamətdə qıraraq, üzərində möhkəmlənərsə, 4.12TL-ə kimi də bahalaşa bilər.
Bununla yanaşı, çərşənbə günü saat 15:00-da Türkiyə Mərkəzi Bankının (TCMB) faiz qərarı məzənnəyə təsiri baxımından diqqət mərkəzində saxlanılmalıdır.
OIL
Enerji bazarlarında isə Brent nefti keçən həftə proqnozlaşdırıldığı kimi təqribən 75$-a kimi dəyər qazanıb. Bundan sonra qismən korreksiya edən bir barel üzrə qiymət 74-75$ aralığında ticarət edilməkdədir və yenidən 75$-a dəyər qazanaraq, üzərində möhkəmlənərsə, 76$ və 78$-a kimi də bahalaşa biləcəyi proqnozlaşdırılır.
GOLD
Əlvan metallar bazarlarında qızılın bir unsiyası üzrə qiyməti də 1334$-a (42.8 $/qram) kimi ucuzlaşıb və 1336$-ın (42.9 $/qram) altında qaldıqca, 1323$-a (42.4 $/qram) kimi də dəyər itirə bilər. Dünya birjalarında dolların aparıcı valyutalara nisbətən qiymətlərində bahalaşma, qızıl qiymətlərinin də ucuzlaşmasına təsir edir.