Azərbaycan, Bakı / Trend / Ölkənin Nazirlər Kabineti taxıl istehsalçılarına, səpilən hər hektar sahəyə görə 40 manat yardım verilməsi barədə sərəncam imzalayıb.
Sərəncam Azərbaycan Respublikasında buğda istehsalçılarının maddi marağını artırmaq, buğda istehsalını stimullaşdırmaq və respublika əhalisinin çörək və çörək məhsullarına olan tələbatını daxili buğda istehsalı hesabına ödəmək məqsədi daşıyır.
Bu vəsaitin bir hissəsi , 2007-ci ilin dövlət büdcəsindən ayrılması nəzərdə tutulmuş 80 milyon manat vəsaitin bölgüsündə nəzərdə tutulmuş yanacaq və motor yağlarına görə istehsalçılara yardımın verilməsinə ayrılmış vəsaitin istifadə olunmamış hissəsi hesabına ödəniləcək.
Çatışmayan vəsait isə, mineral gübrələrin istehsalçılara güzəştlə satılmasına ayrılmış vəsait hesabına həyata keçiriləcək.
Azərbaycan Respublikasının kənd təsərrüfatı nazirliyinə 3 gün müddətində "Kənd təsərrüfatı məhsullarının istehsalçılarına, əkin sahəsinin becərilməsində istifadə etdiyi yanacaq və motor yağlarına görə dövlət büdcəsinin vəsaiti hesabına yardımın verilməsi Qaydaları"nın yeni mexanizmini hazırlayıb, iqtisadi inkişaf nazirliyi və maliyyə nazirliyi ilə razılaşdırmaqla, Azərbaycan Respublikasının Nazirlər Kabinetinə təqdim etmək tarşırılıb.
