Azərbaycan, Bakı / Trend müxbir S.Babayeva/ Azərbaycanın Əmək və Əhalinin Sosial Müdafiəsi Nazirliyinin Gəncə tələbələri və məzunları üçün keçirdiyi əmək yarmarkasının nəticəsinə görə, 33 nəfər daimi işlə təmin olunub. Yarmarkada Gəncə ali təhsil müəssisələrinin (ATM) mindən çox tələbəsi və məzunu iştirak edib. Çərşənbə günü Əmək Nazirliyinin Baş Məşğulluq İdarəsindən verilən məlumata görə, yarmarkada 254 vakant yerlə 26 işəgötürən-müəssisə iştirak edib. 18 nəfər hazırlıq kurslarına göndərilib, 15 nəfər isə əmək yarmarkasında qeydiyyata düşüb. 148 nəfər işə düzəlmək üçün öz rezümelərini işəgötürən şirkətlərə təqdim edib. Yarmarka Gəncə Dövlət Universiteti, Azərbaycan Texnoloji Universiteti, Azərbaycan Müəllimlər İnstitutunun Gəncə Filialı və Azərbaycan Kənd Təsərrüfatı Akademiyası üçün keçirilib. Əmək Nazirliyindən bildiriblər ki, analoji yarmarkanı Mingəçevir ATM-ləri üçün də keçirmək planlaşdırılır.
...