Azərbaycan. Bakı/ Trend , müxbir İ.Xəlilova/ Azərbaycan Bank Tədris Mərkəzi (ABTM) 2008-ci ildə banklarda korporativ idarəetmə sisteminin və strateji planlaşdırmanın təkmilləşdirilməsi üçün yardım göstərməyə davam edəcək. Mərkəzin direktoru Cavanşir Abdullayev bildirib ki, artıq ilk 15 bank bu istiqamətdə işlərin təkmilləşdirilməsi üçün maraqlı olduqlarını bildirib. Korporativ idarəetmə standartlarının tətbiqi Azərbaycan Milli Bankının və bankların əməkdaşlıq etdikləri maliyyə institutlarının tələblərindən biridir. Bundan əlavə, Azərbaycan bank və şirkətlərində korporativ idarəetmə praktikasının təkmilləşdirilməsi üçün Beynəlxalq Maliyyə Korporasiyası da texniki yardım göstərir. Abdullayevin sözlərinə görə, ABTM-nin əməkdaşları hazırda Texnika Bank, Rabitə Bank və Turan Bank-la məsləhətləşmələr aparırlar. Ganja Bank və Mugan Bank-la da işlər davam etdirilir. Mərkəz Bank of Baku və UniBank-la bu istiqamətdə treninqlərin keçirilməsi sahəsində əməkdaşlıq edir. ABTM 320 şirkətlə əməkdaşlıq edir ki, onların da 30-u bankdır. BP neft şirkəti ilə bağlanan iki illik müqaviləyə əsasən, Tədris Mərkəzi şirkətin rəsmi treninq-provayderidir. 2008-ci ildə bir ay ərzində BP üçün treninqlər təşkil ediləcək.
...
