Azərbaycan, Bakı, 25 yanvar/ , müxbir S.Babayeva/ Respublika Quşçuluq Cəmiyyətinin rəhbəri Aydın Vəliyev hesab edir ki , "quş qripi"nin baş qaldırması səbəbindən İran, Türkiyə, Rusiya və Böyük Britaniyadan quş əti məhsullarının Azərbaycana idxalına qoyulan müvəqqəti qadağa ölkənin quşçuluq müəssisələrinin işində fasilə yarada bilər.
"Ölkəmizdə inkubatorlar üçün yumurta bazası yoxdur və biz (quşçular) onları xaricdən - hazırda idxalına qadağa qoyulan ölkələrdən almaq məcburiyyətindəyik" - deyə o bildirib.
Azərbaycanın Kənd Təsərrüfatı Nazirliyi yanında Dövlət Baytarlıq Xidməti ilin əvvəlində Türkiyə, İran, Ukrayna və Hindistandan quş əti məhsulları, yem və heyvan mənşəli məhsulların idxalına müvəqqəti olaraq qadağa tətbiq edib. Ötən il isə bu tədbirlər Rusiyanın Rostov vilayəti, Kanada, Polşa, İsrail, Almaniya, Macarıstan, Yaponiya, Koreya, Səudiyyə Ərəbistanı, Kuveyt və Böyük Britaniya ölkələri ilə bağlı qəbul olunmuşdu.
Cəmiyyət rəhbəri bildirib ki, ehtiyatlar qurtaran zaman quşçuluq müəssisələri gələcək təkrar istehsal üçün toyuq yumurtası çatışmazlığı səbəbindən istehsalı dayandırmaq məcburiyyətində qalacaq.
Vəliyevin proqnozuna görə, yerli müəssisələrin fəaliyyətində fasilələr gələcəkdə defisit və qiymət artımına gətirib çıxara bilər. "Lakin bu, heç də arzuolunan deyil" - deyə o vurğulayıb.
"Quşçular inkubator üçün yumurtanı Niderlanddan ala bilərlər, lakin ƏDV-i nəzərə alsaq, bu, onlara baha başa gələcək" - deyə təşkilat rəhbəri əlavə edib.
Respublika Quşçular Cəmiyyətinin tərkibinə 29 müəssisə daxildir (Mardakan Broyler, Siyazan Broyler, Devechi Broyler, Zira Broyler, Arco Co, Imishli Broyler, Shamkir Broyler). Onlardan 28-i quşçuluq müəssisəsidir, yalnız bir şirkət baytarlıq dərman pereparatlarının distribyutorudur. Azərbaycanda quşçuluq sahəsində fəaliyyət göstərən işçilərin sayı 15-20 min nəfərdir.
Vəliyevin sözlərinə görə, yerli müəssisələr Azərbaycanda quşçuluq məhsullarına olan tələbatın 90 faizini təmin edir. Lakin bununla yanaşı, analoji məhsulların xaricdən idxalı da həyata keçirilir.
