Azərbaycan, Bakı, 22 aprel / Trend , müxbir K.Konırova, S.Babayeva/ Azərbaycanın Qazaxıstandakı səfirliyi Azərbaycanın ehtiyacları üçün taxılın alınmasına dair əvvəllər bağlanmış və haqqı ödənilmiş müqavilələrin dayandırılmaması barədə bu ölkənin hökumətinə müraciət edib. Bu barədə Azərbaycanın Qazaxıstandakı fövqəladə və səlahiyyətli səfiri Lətif Qəndilov məlumat verib.
"Biz əvvəllər bağlanan və haqqı ödənilən müqavilələrin dayandırılmamasına dair Qazaxıstan hökumətinə məktubla müraciət etmişik. Belə ki, iki ölkə arasında müttəfiqlik münasibətləri və strateji tərəfdaşlıq barədə Saziş mövcuddur", - deyə səfir bildirib.
Qazaxıstan hökuməti aprel ayında 2008-ci ilin sentyabr ayı üzrə yeni məhsul yığımına qədər buğda ixracına qadağa tətbiq edib. Xarici KİV-in yazdığına görə, Mərkəzi Asiyada iri taxıl istehsalçısı olan Qazaxıstan bu şəkildə taxılın dünya qiymətlərinin artması fonunda daxili bazarını qorumağa səy göstərir.
"Düşünürük ki, Qazaxıstan tərəfi bizim xahişimizə diqqət yetirəcək", - deyə səfir bildirib.
Azərbaycanın Kənd Təsərrüfatı Nazirliyinin Bitkiçilik məhsullarının emalı, istehsalı və ərzaq ehtiyatlarının dövlət tənzimlənməsi şöbəsinin rəhbəri Sabir Vəliyev əvvəllər bildirib ki, Qazaxıstan tərəfindən buğda ixracına qoyulan qadağa Azərbaycan üçün problem yaratmayacaq. Bu gün ölkədə kifayət qədər - 573 min ton taxıl ehtiyatı var və gərək olduğu təqdirdə beş ay müddətinə tələbatları ödəyə bilər. Ehtiyatlar tükənəcəyi zaman buğdaya olan tələbat daxili istehsal hesabına ödəniləcək. Ölkədə taxıl biçininə iyun ayında başlanacaq və bu il üçün proqnoz 2,3-2,4 mln. ton səviyyəsində müəyyən olunub.
Kənd Təsərrüfatı Nazirliyinin nümayəndəsi bildirib ki, zərurət yaranacağı təqdirdə hökumət Ukrayna, Kanada kimi ölkələrlə taxılın alınmasına dair danışıqlara başlaya bilər.
Azərbaycanın taxıla olan illik tələbatı 3 mln. ton təşkil edir ki, bunun da 1 mln. tonu idxal olunur.