Azərbaycan, Bakı, 22 oktyabr/ Trend , müxbir İ.Xəlilova/ Azərbaycan Əmanətlərin Sığortalanması Fondu (ADİF) III rübün yekunları üzrə Fondun qoruduğu depozit portfelinin həcmini 7,7 faiz - 1,462 mlrd.manatadək artırıb. Bu barədə çərşənbə günü Fonddan məlumat veriblər. Bu, 2008-ci ilin III rübünün yekunları üzrə ADİF-in 38 üzvündən təqvim haqlarının yığılmasının başa çatması nəticəsində baş verib.
Bu dövrdə qorunmayan əmanətlər 251mln. manatdan 268 mln. manatadək, Fondun sığortaladığı əmanətlər - 1 357 mln. manatdan 1 462 mln. manatadək artıb. Fiziki şəxslərin üzv banklardakı əmanət portfeli ikinci rübdə 1 608 mln. manatdan 1 731 mln. manatadək artıb.
Üçüncü rübün yekunları üzrə Fonda 918 min manat (ikinci rübdə 961 min manat olub), 911 min dollar (1 072 dollar), 153 min avro (159 min avro) təqvim haqqı ödənilib. Ümumilikdə rüb ərzində Fond əlavə olaraq 1 312 mln. manat alıb.
Bankların Sığorta Fondunun reyestrinə daxil olarkən birdəfəlik üzvlük haqqı (10 min manat) ödədikiləri nəzərə alınmaqla, daxilolmaların ümumi həcmi 8 897 min manat təşkil edir.
Sığorta edilən əmanətçilərin sayı 6,9 faiz - 1 193 687 nəfərdən 1 275 540 nəfərədək artıb.
Fond 2007-ci il avqustun 13-də fəaliyyətə başlayıb. 2008-ci ilin əvvəlindən maksimal sığorta edilən məbləği 6 min manatadək artırıb, 2010-cu il yanvarın 1-dən bu məbləğ 8 min manatadək artacaq. Əmanətlərin sığortası haqqında Qanuna əsasən, 2008- ci il yanvarın 1-dək 4 min manatadək olan əmanətlər Fond tərəfindən tamamilə qorunurdu.
Bununla yanaşı, faiz dərəcələri AMB-nin uçot dərəcəsini (bu gün 12 faiz) 1,8 dəfə ötən əmanətlər qorunmayacaq. Başqa sözlə, sığorta edilən əmanət üzrə faiz dərəcəsi 21,6 faizədək ola bilər. Banklar belə əmanəti qəbul edərkən, müştərini Sığorta Fondu tərəfindən qorunmanın olmaması barədə xəbərdar etməlidirlər.
Oktyabrın 22 - nə olan cari mübadilə məzənnəsi -- 0,8112 AZN/USD.
Müəlliflə əlaqə saxlamaq üçün elektron ünvan: [email protected]
