...

Azərbaycanda saxta arıçılıq məhsullarının satışına qadağa tətbiq olunacaq

Biznes və iqtisadiyyat xəbərləri Materials 22 Oktyabr 2008 20:32

Trend-i buradan izləyin

Azərbaycan, Bakı, 22 oktyabr/ Trend , müxbir İ.Əlizadə/ "Azərbaycanda arıçılığın inkişafı üçün yaxşı idarəetmə, bu sahənin tənzimlənməsi, həmçinin dövlət dəstəyinin göstərilməsi lazımdır", - Milli Məclisin aqrar qanunvericilik sektorunun direktoru Şahmərdan Kərimov çərşənbə günü parlamentin Aqrar siyasət daimi komissiyasının iclasında "Arıçılıq haqqında" Qanun layihəsinin müzakirəsində bildirib.

"İdarəetmə, tənzimləmə və dövlət dəstəyi olmadan, Azərbaycanda arıçılığı inkişaf etdirmək mümkün deyil, - o bildirib. - Qanun layihəsi bu tədbirlərin həyata keçirilməsni nəzərdə tutur".

Hazırda respublikada 126 min arı ailəsi var. Onların yalnız 1000-i Kənd Təsərrüfatı Nazirliyinin tabeliyində olan müəssisələrdə saxlanılır. Qalanları xüsusi sahibkarlara məxsusdur.

Kərimovun sözlərinə görə, il ərzində Azərbaycanda 1200 ton bal istehsal edilir. Müvafiq olaraq, bir nəfərə 150 qram bal düşür.

Bal istehsalı üzrə birinci yerdə Çin dayanır, sonra Rusiya, Avstraliya, Türkiyə, Ukrayna gəlir.

"Bu ölkələrdə arıçılıq sahəsinin inkişafına xüsusi əhəmiyyət verilir, bunun üçün dövlət büdcəsindən vəsait ayrılır", - Kərimov vurğulayıb.

Rusiya, Ukrayna, Bolqarıstan və Türkiyədə "Arıçılıq haqqında" Qanun qəbul edilib.

Direktor bildirib ki, arıçılıq Azərbaycanın kənd təsərrüfatında vacib yer tutur;onun inkişafı üçün əlverişli coğrafi şərait var.

Qanun layihəsi arıların artırılması, yerli arı növlərinin və populyasiyasının, genezisinin saxlanılması və təkmilləşdirilməsi, sabit irsiyyət əlamətləri olan balverən arıların yetişdirilməsi üzrə işlərin yaxşılaşdırılmasını nəzərdə tutur.

Qanun layihəsinə saxta arıçılıq məhsullarının satış üçün bazara çıxarılmasının qarşısının alınması haqqında maddə də daxil edilib. Yüksək keyfiyyət və təhlükəsizliyini təmin edilməsi üçün arıçılıq məhsulları standartlaşdırılacaq və sertifikatlaşdırılacaq.

Komissiya, müzakirələrin yekunları üzrə Qanun layihəsini Milli Məclisin plenar iclasında birinci oxunuşda müzakirəyə çıxarmağı tövsiyə edib.

Müəlliflə əlaqə saxlamaq üçün elektron ünvan: [email protected]

Xəbər lenti

Xəbər lenti