Azərbaycan, Bakı, 31 oktyabr/ Trend , müxbir İ.Xəlilova/ Parlamentin vitse-spikeri Valeh Ələsgərov hesab edir ki, "Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında" Qanun layihəsinin hazırki redaksiyasıda qəbulu kiçik və orta biznesin və maliyyə - bank sisteminin inkişafına böyük ziyan vuracaq.
Onun sözlərinə görə, sənəddə Qanunun fiziki və hüquqi şəxslərin gəlirlərinə 20 min manat məbləğində limitin tətbiqini nəzərdə tutan yeddinci bəndi daha çox narahatlıq doğurur. Şəxslərin gəlirləri bu limiti ötdükdə, həmin məbləğ maliyyə monitorinqi sisteminə düşür.
"Qanun layihəsini işləyənlər limit səviyyəsinin 15 min avro müəyyən edildiyi Avropa ölkələrinin təcrübəsinə istinad edərək, müddəaları düzgün təfsir etməyiblər", - Ələsgərov Qanun layihəsinin cümə günü Milli Məclisin plenar iclasında müzakirəsi zamanı bildirib.
"Bu limit şəxsiyyətin identifikasiyası olmadan pul köçürmələri aparan şəxslərə aiddir. Başqa halda monitorinqin keçirilməsi tələb olunmur, - parlamentin vitse-spikeri bildirib. - Avropa ölkələrinin vətəndaşalrı İsveçrə bankları vasitəsilə böyük məbləğlərdə əməliyyatlar aparırlar. Eyni zamanda, məsələn, 2003 - cü ildən maliyyə monitorinqinin aparıldığı 1310 işdən yalnız 49 - u üzrə cinayət işi qaldırılıb".
Beynəlxalq Valyuta Fondu və digər beynəlxalq təşkilatların (İnterpol və s.) məlumatlarına əsasən, 2004 - cü ildə dünyada narkotrafikdən ən azı 500 mlrd. avro gəlir əldə edilib, kölgə iqtisadiyyatının ölçüləri isə, trilyonlarla hesablanır.
"Digər ölkələrin təcrübəsinə əsaslanaraq, maliyyə kəşfiyyatı orqanlarının kiçik və orta biznesin və maliyyə-bank sisteminin işinə müdaxiləsinin ölçülərini görmək olar. Terror təşkilatları iri pul köçürmələri üçün heç də mütləq surətdə bank sistemindən istifadə etmirlər, onlar başqa yol seçirlər, - Ələsgərov bildirib. Qanunun qəbulu ölkənin reytinqini artırsa da, əhalinin yaxşı həyatını təmin etməyə imkan verməyəcək. Buna görə də, ilk növbədə, Qanunu təkmilləşdirmək lazımdır".
Parlamentin Iqtisadi siyasət daimi komissiyasının üzvü Vahid Əhmədov hesab edir ki, 20 min manatlıq limitin tətbiqi hüquqi və fiziki şəxslərin gəlirlərinin 90 faizindən çoxunun monitorinqinə gətirəcək, bu isə, Azərbaycan iqtisadiyyatına ciddi zərbə vuracaq. Bu gün Azərbaycanda avtomobil və torpaq sahəsinin alqısı zamanı artıq bu limit ötülür. Bununla əlaqədar parlamentari limitin bu ölçüdə tətbiqini məqsədəuyğun saymır.
"Hesab edirəm ki, fiziki şəxslər üçün limit 50 min manatadək, hüquqi şəxslər üçün 100 min manatadək artırılmalıdır, - Əhmədov bildirib. - Bundan əlavə, vəzifəli şəxslər də maliyyə monitorinqindən keçməlidirlər".
Müəlliflə əlaqə saxlamaq üçün elektron ünvan: с[email protected]