Azərbaycan, Bakı, 07 noyabr/ Trend , müxbir Ü.İsmayılova/ Beynəlxalq Maliyyə Korporasiyası (BMK) 2007-ci ilin dekabrında başlayan texniki dəstəyin ikinci mərhələsi çərçivəsində, Azərbaycan İpoteka Fonduna (AİF) onun gələcək fəaliyyət strategiyasını təqdim edəcək, - AİF-dən cümə günü bildiriblər.
"Almaniya Banklar Akademiyası AİF üçün Fondun gələcək fəaliyyət strategiyasını hazırlayır", - BMK- nın Azərbaycan və Mərkəzi Asiyada ipoteka kreditləşdirməsi layihəsinin eksperti Qart Bedford (Garth Bedford) əvvəllər Trend -a bildirib.
Növbəti mərhələdə Ipoteka Fonduna kommersiya ipotekasına keçiddə yardım göstəriləcək.
"Biz istərdik ki, Fondun fəaliyyəti mümkün olduqca kommersiya əsasında olsun və hazırda bununla məşğuluq - bu, AİF-in yalnız dövlət vəsaitləri deyil, özəl sektor, xarici sərmayədarların vəsaitlərini cəlb etmək bacarığı üzrə başlanğıc strategiyanın bir hissəsidir", - BMK-nin eksperti bildirib. İpoteka istiqrazları sərmayələrin yatırılması variantlarından biri ola bilər.
Hazırda AİF-də subsidiyalaşdırılmış ipoteka modeli tətbiq olunur ki, bu da ipoteka maliyyələşdirməsini məhdudlaşdırır. Fond, imkanlarının genişləndirilməsi və əlavə vəsaitlərin cəlb edilməsi üçün kommersiya ipoteka kreditləşdirməsi modelini tətbiq etməlidir.
Qanunvericiliyin təkmilləşdirilməsi və AİF-in institusional potensialının artırılması üzrə tədbirlər BMK-nın texniki yardım layihəsinin ikinci mərhələsi çərçivəsində aparılır. Layihə Beynəlxalq Maliyyə Korporasiyası tərəfindən İsveçrənin İqtisadi Əlaqələr üzrə Dövlət Katibliyi (Seco) ilə birgə maliyyələşdirilir.
Milli Bank yanında Azərbaycan İpoteka Fondu 2007-ci ilin martında fəaliyyətə başlayıb.
Müəlliflə əlaqə saxlamaq üçün elektron ünvan: [email protected]